काठमाडौं : उपत्यकामा सवारी दुर्घटना बढ्दै गएपछि ट्राफिक प्रहरी आक्रामक रुपमा कारवाहीमा लागेको छ। यहि मंसिर १५ गतेदेखि सवारी साधनका अगाडि पछाडि राखिने बम्पर गार्ड हटाउने अभियान सुरु भएको हो। उपत्यका ट्राफिक महाशाखाले सवारी सुचना जारी गर्दे बम्पर हटाउने अभियान सुरु गरेको हो।
अभियान सुरु गरेकै दिन बम्पर गार्ड राख्ने ५७४ वटा सवारी साधन ट्राफिक कारवाहीमा परेका छन्। विहिबारको ट्राफिक चेकिङका क्रममा बम्पर गार्ड राख्ने कार, भ्यान, जिप, माइक्रोबस, बस, ट्याक्सी चालकलाई रोकी ट्राफिक प्रहरीले कागजपत्र नियन्त्रणमा लिएको थियो। ७ दिनभित्र बम्पर गार्ड हटाउन निर्देशन दिई आवश्यक सुचना जारी गरेको थियो।
विष्ट भन्छन्, 'सवारी साधनमा कम्पनीले अटो रुपमा नै बम्पर राखेको हुन्छ। यसका साथै सवारी धनीले सवारी साधनको सुरक्षाको लागि भन्दै फलाम तथा स्टीलका कडा खालको बम्पर सवारीमा राख्ने गरेका छन्। जसले गर्दा दुर्घटना भएको खण्डमा क्षति बढी हुनेगर्छ। फलामको बम्परले ठक्कर दिएको अवस्थामा घाइतेको बाच्ने संभावना कम हुन्छ।'
ट्राफिक महाशाखाका अनुसार बम्पर गार्ड राख्दा सवारीमा भएको एअर व्याग सेन्सरले राम्रोसँग काम गर्देन। जसको कारण दुर्घटनामा सवारी चालकको क्षति बढी हुन्छ। यस्तै पैदल यात्रुलाई ठक्कर दिंदा क्षति बढी हुन्छ। बम्पर गार्ड राखेको सवारीले अन्य सवारी साधनलाई सामान्य ठक्कर दिए पनि क्षति बढी हुन्छ।
महाशाखाका प्रहरी उपरीक्षक विष्टका अनुसार उत्पादक कम्पनीको भन्दा फरक बनाएर स्वरुप परिवर्तन गरेको अवस्थामा न्युनतम ५ हजार देखि ७ हजार ५ सय रुपैयाँसम्म जरिवाना हुनेछ।
तथ्याकंमा उपत्यकाको सवारी दुर्घटना
ट्राफिक महाशाखाले दिएको तथ्याकं अनुसार उपत्यकामा हरेक दिन २ देखि ४ जनासम्म व्यक्तिको मृत्यु सवारी दुर्घटनाका कारण हुन्छ। उपत्यकाभर आव ७७/७८ मा १७ हजार ६३ वटा सवारी दुर्घटना भए। जसमा १६६ जना व्यक्तिको मृत्यु भयो। सवारी दुर्घटनामा मृत्यु हुनेमा महिलाभन्दा पुरुषको संख्या धेरै छ।
१६६ मा १३९ जना पुरुष र २७ जना महिलाको मृत्यु भएको थियो। यस्तै आव ७८/७९ मा सवारी दुर्घटनाकै कारण १६० जना पुरुष र ३१ जना महिला गरी १९१ जनाले ज्यान गुमाए। यस्तै आव ७९/८० सुरु भएपछि पछिल्लो ४ महिनामा ४४ जना पुरुष र १२ जना महिलाले ज्यान गुमाए। मृत्यु हुनेमा १७ देखि ३५ वर्षका व्यक्तिको संख्या बढी छ।
पछिल्लो समय दुईपांग्रे सवारी साधनको दुर्घटना अत्यधिक छ। ट्राफिक महाशाखाका अनुसार आव ७७/७८ मा ५८४१ मोटरसाइकल तथा स्कुटर दुर्घटनामा परे। आव ७८/७९ मा ८३६४ वटा मोटरसाइकल तथा स्कुटर दुर्घटनामा परे। यस्तै आव ७९/८० सुरु भएपछि २६४६ वटा मोटरसाइकल तथा स्कुटर दुर्घटनामा परे।
प्रतिक्रिया दिनुहोस !
