इलाम: 'सुविधा पास' लिएर भारतीय सवारी नेपाल प्रवेश गर्न थालेका छन् ।
सूर्योदय नगर उद्योग वाणिज्य संघको पहलमा पशुपतिनगर भन्सार कार्यालयले आइतबार(आज)देखि सुविधा पास उपलब्ध गराउन थालेको हो । भारतीय नम्बर प्लेटका निजी सवारीलाई नेपाल भित्रन पशुपतिनगर नाकाबाट ‘सुविधा पास’ उपलब्ध गराइन्छ ।
तीन वर्षदेखि भारतीय सवारी साधनलाई यो सुविधा दिइएको थिएन । भन्सार कार्यालयले बिहीबार सरोकारवालासँग छलफल गरी भारतीय नम्बर प्लेटका जीप, कार र मोटरसाइकललाई ‘सुविधा पास’ दिने निर्णय गरेको थियो ।
पशुपतिनगर भन्सार कार्यालयका प्रमुख प्रेमबहादुर लामाले पशुपतिनगर बजारको तल्लो छेउसम्मका लागि ‘सुविधा पास’ उपलव्ध गराउने व्यवस्था गरेको बताए ।
इलामका प्रमुख जिल्ला अधिकारी माधवप्रसाद ढुंगानाले भारतीय पर्यटकको आवागमन बढाउन यो निर्णय लिएको बताए । उनले भने, ‘व्यापारिक सम्भावना भएको बजार भएपनि कतिपय असहजताका कारण भारतीय पर्यटक आउने सहज वातावरण थिएन । अब भारतीय पर्यटकको संख्या बढ्ने अनुमान गरेका छौँ । सुविधा पासले पनि केही सहजता ल्याउने छ ।'
सूर्योदय उद्योग वाणिज्य संघ र सूर्योदय होटल एसोसिएसन, पर्यटन व्यवसायसँग आबद्ध संघसंस्थाले सीमा नजिकको बजारसम्म भारतीय सवारीसाधनलाई ‘सुविधा पास’मा प्रवेश दिन माग गर्दै आएका थिए । कोभिड १९ को प्रकोप पछि ‘सुविधा पास’ बन्द थियो ।
सूर्योदय नगरपालिकाका मेयर रणबहादुर राईले व्यवसायीले यात्रुसँग चर्को मुल्य असुलेको गुनासो आइरहेकाले मुल्य सूची, भाडा दरमा एकरुपता ल्याएर सेवा प्रदान गर्न सुझाव दिए । उनले भने ‘कानुन अनुसार स्वच्छ र पारदर्शी सेवाका लागि सबैले सहकार्य गर्नु आवश्यक देखिएको छ ।’
‘सुविधा पास’ बन्द भएपछि सूर्योदय नगर उद्योग वाणिज्य संघले सरोकारवालासँग सेवा पूर्ववत खुलाउने पहल भइरहेको संघका अध्यक्ष प्रमोद राईले बताए ।
अध्यक्ष राईले भने, ‘भारतीय नम्बर प्लेटका निजी प्रयोजनका सवारीसाधनले नेपालसँगको सीमा नाघेर पशुपतिनगर बजारसम्म आउन ‘सुविधा पास’ पाउँदा नेपाली बजारमा चहलपहल बढ्ने छ ।’
यसअघि भारतीय गाडीले २४ घण्टासम्म नेपालको सीमाभित्र सवारी सञ्चालन गर्न दैनिक पाँच सय रुपयाँ रकम तिरेर अस्थायी अनुमतिपत्र लिनुपर्थ्यो ।
झापाको मेची भन्सार कार्यालयले असोज १० देखि नै सुविधाको पासमा भारतीय गाडी नेपाल आउने व्यवस्था गरेको छ ।
प्रतिक्रिया दिनुहोस !
