वडासदस्यसँग सल्लाह नै नगरी निर्णय गरेको भन्दै वडाध्यक्षको कार्यकक्षमा ताला
मंसिर २५, २०७९ आइतबार १३:५२:०
तनहुँ: शुक्लागण्डकी नगरपालिका-९ मा वडाध्यक्षको कार्यकक्षमा तालाबन्दी भएको छ। वडाध्यक्ष धनबहादुर पुलामीले एकलौटी गरेको भन्दै वडासदस्य दिपक महतले वडाध्यक्षको कार्यकक्षमा ताला लगाएका छन्।
वडाको हरेक निर्णयमा वडाध्यक्ष पुलामीले वडासदस्यसँग सल्लाह र समन्वयन नगर्ने गरेको महतले बताए । आर्थिक वर्ष २०७९/०८० को बजेट बाँडफाँट र ढोरबाराही मन्दिरको नयाँ समिति गठन लगायतका कार्यहरुमा वडाध्यक्ष पुलामीले एकल निर्णय गरेको उनको आरोप छ।
वडासदस्य महतले भने, ‘हाम्रो वडाध्यक्षले आफू खुसी निर्णय गर्छन् । हामी वडासदस्यको कुनै भूमिका नै छैन । कुनै काममा पनि सल्लाह नगरी काम गर्न थालेपछि ताला लगाउन बाध्य भयौँ ।' आफूहरूलाई मुर्ती जस्तो बनाएको महतको आरोप छ ।
वडाध्यक्ष धनबहादुर थापा पुलामीले भने एकलौटी नगरेको बताएका छन् । सबैसँग सल्लाहमै निर्णय गर्ने गरेको उनले बताए। पुलामीले भने, ‘उहाँलाई हामीले प्रत्येक बैठकमा बोलाएका छौँ । बैठक पुस्तिका हेर्न सकिन्छ । सबै बैठकमा आउनु भएको छ। बैठक भत्ता लिने अनि निर्णय एकल गर्यो भन्ने ? यसो गर्न मिल्छ ?'
वडाका अन्य सदस्य बुद्धिमाया गुरुङ, सुनिता विक र कमल थापाले वडाध्यक्षबाट त्यस्तो एकल निर्णय नभएको बताउँछन्। वडा सदस्य महतको व्यवहार नै गलत भएको उनीहरूको भनाइ छ। यो वडामा नेकपा एमालेको प्यानल नै विजयी भएको थियो।
प्रतिक्रिया दिनुहोस !
