इरान : संयुक्त राज्य अमेरिकाले इरानमा मानवअधिकार हनन गर्नेविरुद्ध प्रतिबन्धको घोषणा गरेको छ। इरानमा जारी प्रदर्शन र त्यसमा सहभागी भएकाहरूप्रति प्रशासनले दमन गरेकाले प्रतिबन्ध लगाउनुपरेको राष्ट्रिय सुरक्षा सल्लाहकार जेक सुलिभानले स्पष्ट पारे।
विश्वका अन्य देशसँग मिलेर इरानी दमनको निन्दा गरिएको बताउँदै उनले सरकारविरोधी शान्तिपूर्ण प्रदर्शनमा दमन नहुनेमा जोड दिए। युरोपेली सङ्घको विदेश मन्त्रीहरूले पनि इरानी धार्मिक नेता, वरिष्ठ अधिकारी र उच्च सरकारी कर्मचारीमाथि प्रतिबन्धको घोषणा गरेका छन्।
सरकारविरोधी प्रदर्शनमा उत्रेका दुई जनालाई दोस्रो पटक सार्वजनिक मृत्युदण्ड दिएपछि अमेरिका र युरोपेली देशले इरानमाथि प्रतिबन्ध लगाएका हुन्। गत सोमबार पनि मानव अधिकार उल्लङ्घनको आरोपमा २० व्यक्ति र एक संस्थामाथि प्रतिबन्ध लगाइएको थियो। रुस र अफगानिस्तान, भेनेजुएला, इरान, चीन र अन्य देशमा पनि मानवाधिकारको स्थिति दयनीय भएकामा अमेरिकाले चिन्ता व्यक्त गरेको छ।
यसअघि अमेरिकाले मानवअधिकार उल्लङ्घनलाई मुद्दा बनाएर रुस र चीनमाथि नयाँ प्रतिबन्ध लगाउने तयारी गरेको थियो। बाइडेन प्रशासनले लगाउने प्रतिबन्धबाट अमेरिकी अधिकारक्षेत्रमा रहेका रुस र चीनका कुनै पनि सम्पत्ति रोक्का गर्ने, अमेरिकाको यात्रा गर्न नपाइने तथा व्यापारिक कारोबार पनि बन्द हुनेछ।
प्रतिक्रिया दिनुहोस !
