वीरगन्ज : भारतबाट तस्करी गरेर वीरगन्जमा भण्डारण गरी राखिएका खाद्यान्न लगायतका सामग्री प्रहरीले बरामद गरेको छ।
वीरगन्ज महानगरपालिका- ११ रानीघाटस्थित घरमा गोदाम बनाएर तस्करहरूले भण्डारण गरी राखेका २१ लाखभन्दा बढी मूल्यको चामल, मैदा लगायतका सामान बरामद गरिएको जिल्ला प्रहरी कार्यालयले जनाएको छ।
सुराकीका आधारमा जिल्ला प्रहरी कार्यालय, वडा प्रहरी कार्यालय विर्ता र सशस्त्र प्रहरी बल नेपाल १३ नम्बर गणबाट खटिएको संयुक्त टोलीले बिहीबार बेलुकी रानीघाटका चारवटा गोदममा छापा मारेर ती सामान बरामद गरेको हो।
प्रहरीले रानीघाटमा श्याम बर्णवाल, सुजित गुप्ता, प्रधुमन गुप्ता र विनोद कुमार साहको अनाधिकृत रूपमा गोदाममा लुकाएर राखिएका २८१ क्वीन्टल चामल, १० क्वीन्टल मैदा, २ कार्टुन सर्जिकल मेडिकल सामग्री, ९ कार्टुन हार्पिक, २ कार्टुन ह्याण्डवास र २ कार्टुन स्प्रे गरी २१ लाख १६ हजार ४ सय रुपैयाँ मुल्यका सामान बरामद गरिको पर्साका प्रहरी उपरीक्षक रमेश बस्नेतले जानकारी दिए।
बरामद सामग्रीहरू अनुसन्धान तथा आवश्यक कारवाहीका लागि शुक्रबार दिउँसो वीरगन्ज भन्सार कार्यालयमा पठाइएको बस्नेतले बताए।
प्रतिक्रिया दिनुहोस !
