काठमाडौं : चकलेटी मोडेल प्रिन्स विश्वकर्मा र खुश्बु खड्काको रोमान्सले भरिएको म्युजिक भिडियो ‘यही कुरा साँचो हो’ सार्वजनिक भएको छ। काठमाडौंको दरबारमार्गस्थित बिलिनियर्स लज एन्ड क्लबमा बिहीबार पत्रकार सम्मेलन गरी उक्त भिडियो सार्वजनिक गरिएको हो। गीतमा नेपाल आइडल सिजन–२ का विजेता रवि ओड र गायिका अस्मिता परियारले स्वर भरेका छन्।
माधव तिम्सिनाको शब्द रहेको सो गीतमा बाबुल गिरीको संगीत रहेको छ भने भीएफवाई टक्सका सञ्चालक तथा युथ मिडिया इन्टरप्रेनर दशरथ सुनारले निर्देशन गरेका छन्। रंगकर्मी नरेन भट्टराईले गीतको सह–निर्देशन गरेका छन्। त्यस्तै, भिडियोमा रामकुमार केसीको छायांकन, राजीव समरको कोरियोग्राफी, टेकेन्द्र शाहको सम्पादन रहेको छ।
निर्देशनभन्दा पनि म्यानेजमेन्टमा बढी लगाव भएका निर्देशक सुनारले यो गीतको शब्द, संगीतले मन छोएपछि निर्देशन तयार भएको बताए। कार्यक्रममा बोल्दै उनले भने, ‘यो म्युजिक भिडियोको कामले थप ऊर्जा बढाएको छ।’ गीतको म्युजिक भिडियो रबि ओडको युट्युब च्यानलमार्फत सार्वजनिक गरिएको छ।
प्रतिक्रिया दिनुहोस !
