बिहारमा चिम्नी विष्फोटमा परी मृत्यु हुनेको संख्या ९ पुग्यो
पुष १०, २०७९ आइतबार १२:१८:०
वीरगन्ज : नेपालसँग सीमा जोडिएको भारतको बिहार राज्यको रामगढवामा शुक्रबार साँझ भएको चिम्नी विष्फोटमा परी मृत्यु हुनेको संख्या ९ पुगेको छ ।
बिहारको रामगढवा थानाअन्तर्गत पर्ने नरिरगिरस्थित इँट्टा भट्टमा शुक्रबार साँझ इँट्टा पोल्न चिम्नीमा आगो बाल्ने क्रममा अचानक चिम्नी विष्फोट भएको थियो ।
चिम्नी विष्फोट भएकै दिन ७ जनाको मृत्यु भएको थियो भने उपचारका क्रममा आइतबार बिहान र शनिबार बेलुकी गरी थप २ जनाको मृत्यु भएको हो ।
पटनाको अस्पतालमा उपचारका क्रममा आइतबार बिहान इँट्टा भट्टाका सञ्चालक नुरुल हकको र मोतिहारीको अस्पतालमा शनिबार बेलुकी मजदुर अनिल महतोको मृत्यु भएको भारतीय सञ्चारमाध्यमले जनाएका छन् ।
विष्फोटमा परि घाइते भएका ७ जनाको उपचार जारी छ। रक्सौलको अस्पतालमा ५ जनाको र पटनाको अस्पतालमा २ जनाको उपचार भइरहेको रक्सौलका पत्रकार दिपक अग्निरथले जानकारी दिए । ती मध्ये दुईजनाको अवस्था गम्भीर रहेको उनले बताए ।
यसैबीच मृतकका परिवारलाई भारतको केन्द्र सरकार र राज्य सरकारले जनही ६/६ लाख भारु राहतका रुपमा दिने घोषणा गरेका छन् । घाइतेहरुको उपचार खर्च पनि भारतीय सरकारले नै व्यहोर्ने जनाएको छ ।
प्रतिक्रिया दिनुहोस !
