भक्तपुरमा हावाबाट बिजुली उत्पादन
![भक्तपुरमा हावाबाट बिजुली उत्पादन](https://annapurnapost.prixacdn.net/media/albums/news-phto1_20221229172405_BLEb1YPpAi.jpg)
भक्तपुर : भक्तपुरमा हावाबाट बिजुली निकालिने भएको छ । जापानीजहरुले गरेको अनुसन्धानको आधारमा भक्तपुरको चाँगुनारायण नगरपालिका दुवाकोटमा हावाबाट बिजुली निकालिन लागेको हो । यसका लागि जापानस्थित जापान इनर्जी सेफ्टी एसोसिएसन (जेइएसए) आवश्यक सम्पूर्ण सामग्रीहरु बिहीबार एक कार्यक्रमबीच हस्तान्तरण गरेको छ ।
भक्तपुरको दुवाकोटस्थित नेपाल इन्जिनियरिङ कलेज (नेक) को भवनको छतमा यो प्रविधि जडान गर्न खोजिएको हो । कार्यक्रममा जेइएसएका इन्जिनियरिङ एडभाइजर इटसयू किरिहाराले कलेजका भाइस प्रिन्सिपल दुर्गाप्रसाद भण्डारीलाई आवश्यक सम्पूर्ण सामग्रीहरु हस्तान्तरण गरे ।
कलेजमा इन्जिनियरिङ अध्ययनरत विद्यार्थीलाई प्रेरणा दिइ उनीहरुबाट पनि यस्ता प्रविधिको विकासका लागि सहयोग होस् भन्ने हेतुले कलेजको भवनमा र कलेजसँग सम्वन्वय गरी यो कार्य गरिएको कार्यक्रममा जनाइयो । साथै विद्यार्थीलाई पनि यस प्रविधिकोबारेमा जानकारी गराई थप अनुसन्धानमा सहयोग गराउने उद्देश्यका साथ यसो गरिएको कार्यक्रममा जनाइयो ।
यसका लागि संस्था र कलेजबीच एक समझदारीपत्रमा हस्ताक्षर गरिएको छ । समझदारीपत्रमा कलेजका प्रिन्सिपल प्राडा हरिकृष्ण श्रेष्ठ र जापानको जेइएसए संस्थाका इन्जिनियरिङ एडभाइजर इटसयू किरिहाराले हस्ताक्षर गरेका छन् ।
उपलब्ध सामानहरु जोडेर केही दिनभित्रै बिजुली निकालिने कलेजले जनाएको छ । यस अनुसन्धानबारे विद्यार्थीलाई पनि कक्षामा अभ्यास गराइने कलेजले जनाएको छ ।
जनाइए अनुसार कलेज भवनको छतमा एउटा एन्टेना (फलामको रड) मा हावा चल्दा घुम्ने गरी मिलाइएको एउटा बाकस जस्तो सामान राखिने छ ।
त्यसपछि त्यसको बेगबाट बिजुली स्टोर हुनेछ । त्यही स्टोर भएको बिजुलीबाट आवश्यकता अनुसार बिजुलीको प्रयोग गरिनेछ । जनाइ अनुसार यसबाट पाँच सय वाटको बिजुली उत्पादन हुने छ ।
जापानका लागि नेपाली फ्रेण्डसिप एम्बेसडर नरेश महर्जनका अनुसार यो डेमोको रुपमा मात्रै राख्न लागिएको हो । हावाबाट पनि बिजुली उत्पादन सम्भव छ र यसै प्रविधिबाट नेपालमा पनि बिजुली उत्पादन उपभोग गर्ने गरी गर्न सकिन्छ भन्ने सन्देश दिन डेमोको रुपमा गर्न खोजिएको जनाइएको छ ।
नेपालका विभिन्न ठाउँहरुमा हावाको गति नापेर अनुसन्धान गर्ने र त्यस अनुसार यो प्रविधिबाट बिजुली उत्पादन गर्ने योजना अगाडि बढाउन यसो गरिएको जनाइएको छ । नेपालमा अहिलेसम्म हाइडोपावरको प्रयोगबाट मात्रै बिजुली निकालिएको छ ।
यसबाहेक सोलार प्रणालीबाट पनि घरघरमा सानोस्तरमा उत्पादन गरी बिजुली निकालिएको छ । यसबाहेक अन्य प्रविधिको प्रयोगबाट उपभोग्य रुपमा बिजुली निकाल्न नसकिएको जनाइएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)