काठमाडौं : टिकटकमार्फत् अनलाइन जुवा खेलाउने चार जना पक्राउ परेका छन्।
पक्राउ पर्नेमा दाङको राप्ती गाउँपालिका-३ घर भई हाल जिल्ला ललितपुर महानगरपालिका-१७ ग्वार्को बस्ने २१ वर्षीय ऋषि प्रकाश योगी, भक्तपुरको सुर्यविनायक नगरपालिका-१० घर भई सोही स्थान बस्ने २७ वर्षीय कपिल गिरी, मध्यपुर ठिमि नगरपालिका-६ घर भई नगरपालिकाको वडा नम्बर १ बस्ने २१ वर्षीय प्रेम कठायत र कैलालीको गौरीगंगा नगरपालिका-६ घर भई हाल मध्यपुर ठिमि- ६ घर भई हाल जिल्ला भक्तपुर मध्यपुर ठिमी -१ बस्ने २० वर्षीय डिल्लीराज अवस्थी रहेका छन्।
एक महिना ६ दिनमा ९३ हजार २ सय १४ बराबरको रकम टिकटक लाइभ जुवा (तास) मार्फत् कारोबार गरेको देखिएको प्रहरीले जनाएको छ।
काठमाडौं उपत्यका भित्र केही व्यक्तिहरूले आफ्नो इसेवा लगायत अन्य डिजिटल वालेटमा विभिन्न व्यक्तिहरूलाई रकम जम्मा गर्न लगाई आफूले लाभ लिने उद्देश्य राखी टिकटक लाइभमार्फत् रकमको वाजी राख्न लगाई जुवा (तास) खेलाउने गरेको भन्ने सूचनाका आधारमा उनीहरूमाथि प्रहरीले निगरानी राखेको थियो।
उनीहरूलाई उपत्यकाका ग्वार्को, सूर्यविनायक, लोकन्थली लगायतका स्थानबाट पक्राउ गरिएको काठमाडौं उपत्यका अपराध अनुसन्धान महाशाखाले जनाएको छ।
प्रतिक्रिया दिनुहोस !
