प्रचण्डले सरकारलाई विश्वासको मत दिन पार्टीहरूको भावनालाई सम्बोधन गर्ने बताए।
काठमाडौंः प्रधानमन्त्री तथा नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पार्टीमा व्यापक रूपान्तरण गर्ने बताएका छन् ।
आइतबार दिउँसो पेरिसडाँडामा माओवादी केन्द्र बागमती प्रदेशमा कार्यरत केन्द्रीय सदस्यहरू सम्मिलित केन्द्रीय बागमती प्रदेश समन्वय समितिको बैठकमा बोल्दै प्रचण्डले पार्टी रुपान्तरण अहिलेको आवश्यकता रहेको बताएका हुन् ।
बैठकलाई सम्बोधन गर्दै प्रधानमन्त्री प्रचण्डले भने,‘पार्टीको स्थायी समिति बैठकले २ महिना संगठनात्मक अभियान सञ्चालन गर्ने निर्णय गरेको छ । अब पार्टीका सबै नेता,कार्यकर्ता जनतामा जानुछ । २ महिना पार्टीका तल्ला कमिटीमा जान्छौँ,कार्यकर्ता र जनतासँग अन्तरक्रिया गर्छौं ।’
प्रधानमन्त्री प्रचण्डले जनताको हितमा काम गर्ने प्रतिवद्धता जनाए। ‘हामीले सरकारको नेतृत्व गरिरहेका छौँ,यो हाम्रा लागि चुनौतीपूर्ण अवसर हो’ प्रधानमन्त्रीले भने,‘यो कार्यकाललाई नयाँ शिराबाट लैजान खोजेका छौं । सरकारले जनताको हितलाई केन्द्रमा राखेर काम गर्छ । सरकारले राम्रो काम गर्नु भनेको पार्टी पुननिर्माणको आधार तयार पार्नु पनि हो । तपाईहरू पनि यसलाई केन्द्रमा राखेर काम गर्नुहोला ।’
प्रचण्डले सरकारलाई विश्वासको मत दिन पार्टीहरूको भावनालाई सम्बोधन गर्ने बताए। उनले भने,'विश्वासको मतपछि परिस्थितिमा हेरफेर आएको छ । विश्वासको मतपूर्व एउटा वातावरण थियो,त्यसपछि नयाँ परिस्थिति बन्यो,सरकारलाई विश्वासको मत दिने पार्टीहरूको भावना पनि हामीले सम्बोधन गर्नुछ । हामीले राष्ट्रिय एकताका निम्ति नै पहल गर्नुपर्छ । त्यसकारण मैले राष्ट्रिय सहमतिमा जोड दिँदै आएको छु ।’
प्रतिक्रिया दिनुहोस !
