एमालेले राष्ट्रपति माग्दै हिँडेको थिएन, प्रचण्डले नै बचन दिएका हुन् : योगेश भट्टराई

वीरेन्द्रनगर : नेकपा एमालेका सचिव योगेश भट्टराईले एमालेले राष्ट्रपति माग्दै नहिँड्ने बताएका छन्।वीरेन्द्रनगरमा आयोजित पत्रकार सम्मेलनमा उनले प्रचण्ड आफैंले राष्ट्रपति र सभामुख एमालेलाई दिने बचन दिएको बताए। 

'एमाले पर्ख र हेरको अवस्थामा रहँदा गत पुस १० गते बालुवाटारबाट प्रचण्ड बालकोट पुगेकै हुन्। बालकोटमा प्रचण्ड आफैंले एमाले-माओवादी ढाई ढाई वर्ष सरकारको नेतृत्व गर्ने, पहिलो कार्यकाल कांग्रेसले आफूलाई नेतृत्व नदिदा एमालेसँग आउनु परेकाले आफूलाई पहिलो कार्यकाल सरकारको नेतृत्व दिनुपर्ने र यसो गरेबापत ठूलो दलको हिसाबले एमालेलाई सभामुख र राष्ट्रपति दिने सहमित गरेका हुन् हामीलै कसैसँग पनि पद मागेका थिएनौं,' उनले भने। 

एमालेले सुरु गरेको दुई महिने मिशन ग्रासुट अभियानको सिलसिलामा सुर्खेत आएका युवा नेता भट्टराईले आगामी बैशाख ९ गतेसम्म एमालेलाई व्यवस्थित र ऊर्जाशील पार्टी बनाउन लागिरहेको बताए। 'पार्टीको संगठन सदृढ र विस्तार गर्नका लागि यो अभियान थालिएको हो। गत निर्वाचनमा पार्टीका नेताहरूले गरेका सहयोग र असहयोगको सूचना संकलन पनि गर्नु हो। असहयोग गरेको तथ्य भेटिए केन्द्रीय स्तरका नेताहरू पनि कारबाहीमा पर्छन्,' उनले भने। कर्णालीमा पार्टी उपाध्यक्ष सुवास नेवाङको नेतृत्वमा अनुगमन समिति पनि खटाएको छ।