अदालतको अनुमतिसँगै क्यानले सन्दीपलाई युएई पठाउने प्रक्रिया थाल्यो
फागुन १५, २०७९ सोमबार १८:१८:३२
काठमाडौं : नेपाल क्रिकेट संघ (क्यान)ले राष्ट्रिय टोलीका पूर्वकप्तानसमेत रहेका सन्दीप लामिछानेलाई युएई पठाउने प्रक्रिया थाल्ने भएको छ। सर्वोच्च अदालतले विदेश जाने अनुमति दिएपछि क्यानले क्रिकेट खेलमा सहभागी गराउन प्रक्रिया थाल्ने भएको हो।
क्यानका कार्यबाहक सदस्य दुर्गा पाठकले टिम व्यवस्थापकसँग छलफल अगाडि बढाएको बताए। उनले सकेसम्म छिट्टै युएई पठाउने बताए। 'सकेसम्म छिट्टै युएई पठाउने हाम्रो योजना हो। यसका लागि हामीले टिम व्यवस्थापकसँग छलफल गरिरहेका छौं,' उनले अन्नपूर्णसँग भने।
युएईमा नेपाल, युएई र पीएनजी सम्मिलित त्रिदेशीय शृखंला सुरु भएको छ। नेपालमा राम्रो प्रदर्शन गरेपछि क्यानले सन्दीपलाई युएई भ्रमणमा लैजाने तयारी गरेको थियो।
सन्दीपले युएई जानका लागि सर्वोच्चमा निवेदन दिएका थिए। सोही निवेदनमाथि सुनुवाई गर्दै खेलकुद गतिविधिमा सहभागी भएर १५ दिनभित्र जिल्ला अदालतमा जानकारी गराउन आदेश दिएको छ। सोमबारदेखि सुरु भएको खेलमा नेपाल र पीएनजीको खेल जारी छ। नेपाल जितका लागि पीएनजीले दिएको २०४ रनको लक्ष्य पछ्याइरहेको छ।
प्रतिक्रिया दिनुहोस !
