विराटनगर: सुनसरीको हरिनगर गाउँपालिका ५ स्थित नरकटियाबाट सशस्त्र प्रहरीले ठूलो परिमाणमा गाँजा बरामद गरेको छ ।
सशस्त्रको वसन्तपुर बीओपीबाट खटिएको ७ जना मोबाइल गस्तीको टोलीले सोमबार राति करिब १० बजेतिर गाँजा बरामद गरेको हो । सहायक प्रहरी निरीक्षक सुमन रानाभाटको कमाण्डमा खटिएको टोलीले उक्त गाँजा बरामद गरेको सशस्त्र प्रहरी बल प्रदेश १ का प्रमुख डीआइजी कमल गिरीले बताए ।
बरामद गाँजा २५८ किलोग्राम रहेको उनले जानकारी दिए । भुटाहाबाट घुस्कीतर्फ जाँदै गरेको ‘बिआर १ एके ७१००’ नम्बरको भारतीय स्कोरपियोलाई चेकजाँच गर्दा सशस्त्रले गाँजा बरामद हो ।
प्रहरीले गाडी रोकेर चेकजाँच गर्न खोज्दा चालक भने गाडी नरोकी भाग्ने प्रयास गर्दा गाडीको पिछा गर्ने क्रममा खेतको छेउमा गाडी र गाँजा बरामद गरिएको सशस्त्रले जनाएको छ ।
प्रहरीका अनुसार चालक फरार छन्। बरामद गरिएको गाँजा भने प्रहरीले जिल्ला प्रहरी कार्यालय सुनसरीलाई बुझाएको जनाएको छ ।
प्रतिक्रिया दिनुहोस !
