क्याम्ब्रिज विश्वविद्यालयमा राहुल गान्धीले भने, ‘मोदीले देश बर्बाद गर्दै छन्’

नयाँ दिल्ली : बेलायतको क्याम्ब्रिज विश्वविद्यालयमा लेक्चर दिन गएका भारतीय कांग्रेस नेता राहुल गान्धीले मोदी सरकारमाथि गम्भीर आरोप लगाएका छन् ।

कांग्रेसका वरिष्ठ नेता साम पित्रोदाले उक्त लेक्चरको भिडियो आफ्नो युट्युब च्यानलमा सार्वजनिक गरेका छन् ।

यस भिडियोमा राहुल गान्धीले भारत जोडो यात्रा, भारतीय लोकतन्त्र, मिडिया, न्यायपालिका जस्ता धेरै विषयमा कुरा गरेका छन् ।

राहुल गान्धीले मोदी सरकारको नीतिको प्रशंसा र आलोचना गर्दै आफ्नो धारणा राखे।

राहुल गान्धीले भने, ‘महिलाहरूलाई ग्यास सिलिन्डर दिनु र मानिसहरूको बैंक खाता खोल्नु राम्रो कदम हो। यस्ता कदमलाई गलत भन्न मिल्दैन । तर मेरो विचारमा मोदीले भारतको बनावट ध्वस्त पारिरहेका छन् । उनीहरूले भारतमा यस्तो विचार थोपिरहेका छन्, जुन भारतले स्वीकार गर्न सक्दैन ।'

'भारत राज्यहरूको संघ हो। भारतमा धार्मिक विविधता छ। भारतमा सिख, मुस्लिम र ईसाईहरू छन्, तर मोदीले उनीहरूलाई दोस्रो दर्जाको नागरिकको रूपमा व्यवहार गर्छन्। म त्यसमा सहमत छैन। तपाईंको विरोध यति गहकिलो कुरामा छ भने दुई वा तीन नीतिहरूमा सहमत भएर केही फरक पर्दैन।'

राहुल गान्धीले क्याम्ब्रिज विश्वविद्यालयमा ‘लर्निङ टु लिसनिङ’ विषयमा विद्यार्थीहरूलाई लेक्चर दिएका थिए। बीबीसी