लुम्बिनी : लुम्बिनी बौद्ध विश्वविद्यालय प्राध्यापक संघको राष्ट्रिय अधिवेशन लुम्बिनीमा शनिबार भएको छ। अधिवेशनको उद्घाटनमा बोल्दै वक्ताहरूले विश्वविद्यालयको संख्या वृद्धि नभई गुणस्तरीय विकास ध्यान दिनुपर्ने बताए।
लुम्बिनी बौद्ध विश्वविद्यालयका निमित्त उपकुलपति डा. तिलकराम आचार्यले नयाँ विश्वविद्यालय खोल्ने नभई भएका विश्वविद्यालयलाई गुणस्तरीय बनाउनुपर्ने बताए।
हाल रहेका विश्वविद्यालयमा विद्यार्थी अभाव रहिरहेका बेला नयाँ विश्वविद्यालय खुल्दै जाँदा त्यसले झन विकराल समस्या निम्तिने उनले बताए।
‘सञ्चालनमा रहेका विश्वविद्यालयको गुणस्तरियता मापनका आधारमा मूल्यांकन र रेखांकन हुनुपर्छ, उनले भने, ‘विद्यार्थी अभाव झेलिरहेको अवस्थामा नयाँ उस्तै शैक्षिक कार्यक्रम सञ्चालन गर्नका लागि विश्वविद्यालय जरुरी छैन।’
विश्वविद्यालयबाट उत्पादन भएको जनशक्ति खपत हुन नसकिरहेको अवस्थामा त्यसको जिम्मेवारीबोध प्राध्यापक तथा पदाधिकारीहरू लिनुपर्ने उनले औल्याए।
उच्च शिक्षा सुधारका सन्दर्भमा प्राध्यापक संघले विशेष अभियान चलाउनुपर्ने तथा विश्वविद्यालयको नियमन गर्ने अनुदान आयोगलाई सशक्त बनाउनुपर्ने उनले बताए।
अबको मिसन भनेको दक्ष जनशक्ति उत्पादनलाई बनाउनुपर्ने भन्दै उनले अनुसन्धानमा क्रियाशील व्यक्तिहरू प्रतिष्पर्धाबाट विश्वविद्यालय प्रवेश हुनुपर्ने बताए।
नेपाल प्राध्यापक संघका केन्द्रीय अध्यक्ष प्रा.डा. रमेश प्रसाद जोशीले लोकतन्त्र प्राप्तिका आन्दोलनमा अग्र मोर्चामा संघले काम गरेको भन्दै अहिले क्षमता विकासका काममा क्रियाशील रहेको बताए। ‘हामीले अहिले प्राज्ञिक विकासका काम थालेका छौं, अध्ययन अनुसन्धानमा जोड गरिएको छ,' उनले भने।
मुलुकमा प्राध्यापकहरूको अवमूल्यन गरिने गरेको भन्दै उनले बौद्धिक जमातलाई अग्रभागमा सम्मान नदिने हो भने मुलुक बन्न नसक्ने उनले बताए।
उनले प्राध्यापक संघ विश्वविद्यालयसँग वादविवाद, संघर्ष गर्नका लागि नभई प्राज्ञिक उन्नयन तथा पदाधिकारीका लागि सुझाव दिनका लागि रहेको बताए।
लुम्बिनी बौद्ध विश्वविद्यालयका डिन डा. हरिशरण चँखूले बुद्धले निर्माण गरेको संघ जस्तै प्राज्ञिक विकासमा प्राध्यापक संघले काम गर्नुपर्ने बताए।
विश्वविद्यालयका परीक्षा नियन्त्रक इन्द्र काफ्लेले बौद्ध विश्वविद्यालयलाई बौद्ध भावनाको माध्यमबाट विशिष्टकृत बनाउन प्राध्यापक संघले काम गर्नुपर्ने बताए।
सिटी क्याम्पस प्रमुख फणिन्द्र कुमार न्यौपानेले गुणस्तरीय शिक्षण, व्यक्तित्व विकासमा संघले काम गर्नुपर्ने सुझाव दिए।
केन्द्रीय क्याम्पस प्रमुख निरबहादुर गुरुङले प्राज्ञिक विकासलाई पहिलो एजेण्डा बनाएर हिँड्दा संघको अभियान सफल हुने बताए।
सहायक क्याम्पस प्रमुख डा. शारदा पौडेलले प्राध्यापकहरूलाई अध्ययन, अनुसन्धानमा सक्रिय बनाउँदै लैजाने काम थाल्न जरुरी रहेको बताइन्।
लुम्बिनी बौद्ध विश्वविद्यालय प्रशासन शाखा प्रमुख चुरामणि पोखरेलले गुणस्तरीय शिक्षण, दक्ष जनशक्ति उत्पादन तथा विश्वविद्यालयको प्राज्ञिक उन्नयनमा प्राध्यापकहरूले जोड दिनुपर्ने बताए।
लुवौवि प्राध्यापक संघ तदर्थ समितिका संयोजक बलबहादुर पाण्डेले विश्वविद्यालयको प्राज्ञिक विकास तथा प्राध्यापकहरूको हक हितका लागि संघ स्थापना गरिएको बताए।
प्राध्यापक संघमा नयाँ नेतृत्व
लुबौवि प्राध्यापक संघको पहिलो अधिवेशनले नयाँ नेतृत्व चयन गरेको छ। केन्द्रीय समितिको अध्यक्षमा गुणाखर गैरे, उपाध्यक्षमा डा. दीपक आचार्य, महासचिवमा मेघनाथ खनाल, कोषाध्यक्षमा अन्जु खनाल निर्बिरोध निर्वाचित भएका छन्। सदस्यमा डा. निमा शेर्पा, कविर शाक्य, भोगेन्द्र यादव निर्वाचित भए।
केन्द्रीय क्याम्पस इकाई समितिको अध्यक्षमा सिरी बजिर स्थविर, उपाध्यक्षमा फुर्वा शेर्पा र सचिवमा मञ्जिल सुवेदी निर्विरोध चयन भएका छन्। सदस्यमा हिसे दोर्जे लामा र भिमबहादुर कुवंर निर्वाचित भए।
सिटी क्याम्पस इकाइ समितिको अध्यक्षमा मोहनलाल भण्डारी, उपाध्यक्षमा दयाराम भण्डारी, सचिवमा शान्त पन्त भट्ट, सदस्यहरूमा कमल मरासिनी, रमेश यादव र अरुण सिंह निर्विरोध निर्वाचित भएका छन्।
नेपाल प्राध्यापक संघको अधिवेशनका लागि केन्द्रीय प्रतिनिधिमा बद्री शर्मा गौतम, बलबहादुर पाण्डे, दयाराम गौतम र कुमार खड्का चयन भएका छन्।
२०७८ फागूनमा बलबहादुर पाण्डेको अध्यक्षतामा तदर्थ समिति गठन भएको थियो। तदर्थ समितिले निर्वाचनका लागि परीक्षा नियन्त्रक इन्द्र काफ्लेको संयोजकत्वमा डा. शारदा पौडेल र चुरामणि पोखरेल सदस्य रहेको निर्वाचन समिति बनाएको थियो।
पहिलो अधिवेशन तदर्थ समितिका संयोजक बलबहादुर पाण्डेको अध्यक्षता, सदस्य अञ्जु खनालको स्वागत तथा सदस्य मेघनाथ खनालको सञ्चालनमा सम्पन्न भएको थियो। अधिवेशनले संघको विधान सर्वसम्मत पारित गरेको छ।
प्रतिक्रिया दिनुहोस !
