मेटाले फेरि १० हजार कर्मचारी हटाउने

क्यालिफोर्निया : फेसबुक, इन्स्टाग्राम र ह्वाट्सएपको स्वामित्वमा रहेको कम्पनी मेटाले १० हजार मानिसलाई जागिरबाट निकाल्ने जनाएको छ । नोभेम्बर २०२२ पछि मेटाले यति ठूलो संख्यामा मानिसहरूलाई निकालेको यो दोस्रो पटक हो।

सो समय कम्पनीले ११ हजार जनालाई जागिरबाट हटाएको थियो । मेटाका प्रमुख कार्यकारी तथा संस्थापक मार्क जुकरबर्गले यो निर्णय निकै कठिन तर आवश्यक रहेको बताए।

१० हजारलाई जागिरबाट हटाएपछि कम्पनीमा ५ हजार दरबन्दी खाली राखिनेछ । जुकरबर्गले कर्मचारीलाई सन्देशमा  कम्पनीले सन् २०२२ मा आफ्नो राजस्वमा उल्लेख्य गिरावट आएको थाहा पाएपछि झट्का भोग्नुपरेको थियो ।

उनले अमेरिकामा बढेको ब्याजदर, विश्वको अस्थिरता र नियामक कानुनमा भएको वृद्धिले आम्दानीमा गिरावट आएको बताए ।

जुकरबर्गले कर्मचारीहरूलाई सन्देशमा भने, 'मलाई लाग्छ कि हामी नयाँ आर्थिक अवस्थासँग जुध्न तयार हुनुपर्छ किनभने यो अवधि अलि लामो हुनेछ।'

 
यसअघि गुगल र अमेजन जस्ता ठूला कम्पनीहरूले पनि कर्मचारी हटाएका थिए। 

यस वर्षको सुरुमा अमेजनले १८,००० लाई जागिरबाट निकालेको घोषणा गरेको थियो । ‘कोरोना महामारी’ को समयमा ‘अनिश्चित अर्थतन्त्र’ र अव्यवस्थित रोजगारी सिर्जनाका कारण यस्तो गर्नुपरेको कम्पनीले जनाएको थियो ।

गुगलका मालिक अल्फाबेटले पनि १२ हजार रोजगारी कटौती गरेका थिए ।

कम्पनीहरूमा कामको अध्ययन गर्ने वेबसाइटका अनुसार यो वर्षको पहिलो केही महिनामा मात्रै प्रविधि कम्पनीहरूले विश्वभर १,२८,००० मानिसहरूलाई कामबाट निकालेका छन्। बीबीसी