बेनी-जोमसोम सडक दैनिक ५ घण्टा बन्द

जोमसोम : राष्ट्रिय गौरवको कालिगण्डकी करिडोर (बेनी–जोमसोम–कोरला सडक) दैनिक ५ घण्टा बन्द हुने भएको छ । कालिगण्डकी करिडोर (बेनी–जोमसोम–कोरला) सडक आयोजनाको समन्वयमा जिल्ला प्रशासन कार्यालय म्याग्दीले चैत्र ३ गते शुक्रबारदेखि लागु हुने गरी बेनी–जोमसोम ७६ किमी सडकमा दैनिक ५ घण्टा टाइमकार्ड लागु गरेको हो ।

 
म्याग्दी प्रशासनले बुधबार एक सूचना प्रकाशित गरी बेनी–जोमसोम सडक बन्द हुने जनाएको छ । बेनी–जोमसोम सडकको प्याकेज नम्बर २ अन्तर्गत पर्ने अन्नपूर्ण गाउँपालिका–३ रुप्से सडक खण्डमा बेलीब्रिजसहित पहिरो रोकथामको कार्य भइरहेको र सडक विस्तार एवं स्तरोन्नतिका काम भइरहेकोले बिहान ६ बजेदेखि ९ बजेसम्म र दिउँसो १ बजेदेखि दिउँसो ३ बजेसम्म सडक बन्द निर्णय गरेको म्याग्दीका सहायक प्रमुख जिल्ला अधिकारी धिरेन्द्रराज पन्तले जानकारी दिए । 

बेनी–जोमसोम सडक चैत्र २ गतेदेखि चैत्र १४ गतेसम्मको लागि बन्द गरिएको हो । तर, चैत्र ६, ७ र ८ गते ३ दिन भने सडक बन्द नहुने सूचनामा उल्लेख गरिएको छ ।

बेनी–जोमसोम सडकको दोश्रो प्याकेज रुप्सेमा ३ वर्षअघि आयोजनाद्वारा निर्माणधीन पक्की पुल बाढीले बगाएको थियो । त्यहा पुल नहुँदा सडक आउजाउमा समस्या थियो । आयोजनाले सो स्थानमा अस्थायी बेलिब्रिज स्थान्तरण गर्न लागेको छ । 
बेनी–जोमसोम सडकको केही स्थानमा पक्की पुल निर्माण सम्पन्न भएपछि  कही बेलिब्रिज जगेडा बसेको थियो । आयोजनाले पुल स्थान्तरणसहित करिव ३ सय मिटर सडकको एप्रोजसहितको काम गर्न  ३ करोड ५९ लाखमा ठेक्का सम्झौता गरेको थियो । त्यहाँ मुक्तिनाथ निर्माण सेवाले सडकको काम गरिरहेको छ ।
 
यस्तै सो स्थानमा कमजोर भुबनोटका कारण बर्सेनि बाढी-पहिरो र नदी कटानले सडकमा क्षति पुर्‍याउने गरेकोमा त्यस स्थानमा पहिरो रोकथाम तथा नियन्त्रण सम्वन्धि प्राविधिक अध्ययन भइरहेको छ ।