बेनी : म्याग्दीको धवलागिरी गाउँपालिकामा भएको छुट्टाछुट्टै घटनामा दुई जनाको मृत्यु भएको छ । धवलागिरी गाउँपालिका–६ मराङको नामरुकमा भिरबाट लडेर र वडा नम्बर ७ को धारापानीमा ढुङ्गाले लागेर एक/एक जनाको मृत्यु भएको जिल्ला प्रहरी कार्यालय म्याग्दीले जनाएको छ ।
प्रहरी नायव उपरीक्षक मदन कुँवरले दुवै जनाको शव आइतबार राती परीक्षणका लागि बेनी अस्पतालमा ल्याइएको बताए । मराङको राम्चेदेखि बुल जाने क्रममा नामरुकको भिरको सडकको डिलबाट खसेर आइतबार दिउँसो जेवाङ टोलका अन्दाजी ५२/५४ वर्षका सङबहादुर सुनारको मृत्यु भएको प्रहरीले जनाएको छ ।
डोजरले फालेको ढुङ्गाले लागेर मृत्यु
धारापानी सामुदायिक वनको पात्लापाखा भिरमा घाँस काट्न गएका धारापानीका ६८ वर्षीय लालु थापालाई सडक निर्माणका क्रममा डोजरले फालेको ढुङ्गाले लागेर शनिबार मृत्यु भएको थियो ।
साँझ घर नआएपछि खोज्न गएका स्थानीयबासीले शनिबार राती थापालाई भिरमा मृत फेला पारेर प्रहरीलाई खबर गरेका थिए । दरवाङ–धारापानी सडक आयोजनाको निर्माण कम्पनीको डोजरले सडक विस्तारका क्रममा फालेको ढुङ्गाले घाँस काट्न गएका थापालाई लागेको मृतकका आफन्तले बताएका छन् ।
मृतकका आफन्तले दिएको जाहेरीको आधारमा अनुसन्धान अघि बढाएको र दुई वटै शवलाई परीक्षणका लागि बेनी अस्पतालमा राखिएको प्रहरी नायव उपरीक्षक कुँवरले बताए ।
प्रतिक्रिया दिनुहोस !
