बेनी : म्याग्दीको सदरमुकाम बेनी बजारमा कटान र बाढी नियन्त्रण गर्न आठवटा आयोजना सञ्चालनमा आएका छन्। कालीगण्डकी र म्याग्दी नदीको दोभानमा अवस्थित बेनी बजारमा कटान र बाढी नियन्त्रण गर्न एकै साथ आठ ठाउँमा नियन्त्रणको काम थालिएको हो । बेनीलाई सरकारले नदी कटानका हिसाबले जोखिमयुक्त जिल्ला सदरमुकामको सूचिमा राखेको छ ।
उर्जा, जलस्रोत तथा सिचाई मन्त्रालबय अन्तरगतको रुपाताल संरक्षण एकीकृत विकास परियोजनाले यसपाली बेनी र आसपासका क्षेत्रमा करिब पचास करोड रुपैयाँ लागतमा नदी नियन्त्रण योजना कार्यान्वयन भएको जनाएको छ ।
परियोजनाका प्रमुख विदुर श्रेष्ठले नदी कटानको उच्च जोखिममा रहेको बेनी बजार, गलेश्वर क्षेत्र, राममन्दिर र पर्वत बेनी आसपासका बस्तीलाई संरक्षण गर्न आठ प्याकेजमा काम भइरहेको जानकारी दिए ।
‘एक वटा गत वर्षको र सात वटा यस वर्षको मध्य छ वटा प्याकेजको ठेक्का सम्झौता भएर काम सुरू भइसकेको छ,’उनले भने, ‘म्याग्दी नदी किनारमा तीन र कालीगण्डकीमा पाँच ठाउँमा कटान नियन्त्रण गर्ने संरचना निर्माण गर्न लागिएको हो ।’
नौ करोड ४५ लाख रुपैयाँमा ठेक्का सम्झौता गरेको रौताह–बिएनबी कन्ट्रक्सन जेभीले कालीगण्डकी किनारमा १६४ मिटर लामो र ८ मिटर अग्लो काउन्टर फोर्ट प्रविधिको पक्की पर्खाल निर्माण गरिरहेको छ । सो ठेक्कामार्फत गत वर्ष कालीपुलको कालीगण्डकी किनारमा ८० मिटर पक्की र मंगलाघाटको म्याग्दी नदी किनारमा ४६ मिटर कम्पोजित पर्खाल निर्माण भएको थियो ।
मङ्गलाघाटस्थित म्याग्दी नदीको किनारमा दुईवटा प्याकेजमा २६२ मिटर लामो कम्पोजित प्रविधिको पर्खाल बनाउन पाँच करोड ७७ लाख रुपैयाँमा सुप्रिम कन्ट्रक्सनसँग ठेक्का सम्झौता भएको परियोजनाका ईञ्जिनियर कृष्ण विश्वकर्माले जानकारी दिए ।
बेनी नगरपालिकाको वडा नम्बर २ स्थित बेनी–बागलुङ सडकको भसभसे पहिरो र म्याग्दी नदी कटान नियन्त्रणका लागि ७५ मिटर लामो कम्पोजित पर्खाल बनाउन दुई करोड ३० लाख रुपैयाँमा ठेक्का सम्झौता गरेको हिमालयन कन्ट्रक्सनले तिब्रताका साथ काम गरिहरेको छ ।
पर्वतको जलजला गाउँपालिका–३ वारीबेनी स्थित कालीगण्डकी किनारमा ८० मिटर पर्खाल बनाउन तीन करोड २० लाख रुपैयाँ लागत अनुमान गरिएकोमा ठेक्का सम्झौताको प्रक्रीयामा छ । बेनी नगरपालिका–९ स्थित राहुघाट नदी किनारमा ९० मिटर लामो पर्खाल बनाउन भाग्यलक्ष्मी बिआरटिले दुई करोड ६८ लाख रुपैयाँमा ठेक्का लिएको छ ।
जलजला गाउँपालिकाको बगरफाँटमा कालीगण्डकी किनारमा ८५ मिटर लामो पर्खाल बनाउन तीन करोड २० लाख रुपैयाँमा ठेक्का लिएको माछापुच्छ्रे निर्माण सेवाले पनि काम गरिरहेको छ । कालीगण्डकी र राहुघाट नदीको दोभान स्थित जलजला गाउँपालिका–२ को राममन्दिरमा पक्कि पर्खाल बनाउन माछापुच्छ्रे निर्माण सेवाले चार करोड ३२ लाख रुपैयाँमा ठेक्का लिएको छ ।
मंगलाघाटको ठेकेदार केही दिनमा कार्यक्षेत्रमा आउने तयारी गरेको र अन्य ठाउँको ठेक्का लिएका निर्माण कम्पनीले बर्खा अघिनै सम्पन्न गर्ने लक्ष्य सहित मजदुर र उपकरण परिचालन गरिएको जनाएका छन् । रातीको समयमा पनि काम गरिरहेका छन् ।
बेनी बजारका बासिन्दा समेत रहेका संविधानसभा सदस्य रेशमबहादुर बानियाले नदी नियन्त्रण आयोजना निर्माणको काम सुस्त भएको गुनासो गर्नुभयो । ‘नदीमा पानीको सतह बढ्न शुरु नहुदै काम सकिनुपर्ने थियो तर गर्मी बढेर नदीमा पानीको सतह बढ्न थालेपछि काम हुन थालेको छ,’उनले भने, ‘मजदुर र उपकरणलाई खण्ड खण्ड मा परिचालन गरेर कामलाई तीब्रता नदिने हो भने थप क्षतिको जोखिम देखिन्छ ।’
प्रतिक्रिया दिनुहोस !
