गुलरिया : बर्दियाको बढैयाताल गाउँपालिकामा सम्पन्न अध्यक्ष कप फुटबल प्रतियोगिताको उपाधि आयोजक बढैयातालले उचालेको छ।
बर्दिया जिल्ला अन्तरपालिका स्तरिय फुटबल खेलमा मधुवन नगरपालिकालाई २-१ गोलले पराजित गर्दै आयोजक टिमले उपाधि हात पारेको हो।
खेलको विजेता बनेको बढैयातालले उपाधि सहित १ लाख ५ हजार ५ सय ५५ रुपैयाँ, शिल्ड, ट्रफी, मेडल र प्रमाणपत्र प्राप्त गर्दै आयोजक च्याम्पियन बनेको छ।
पहिलो र दोस्रो संस्करणमा विजेता बनेको मधुवन नगरपालिका चौथो संस्करणको प्रतियोगितामा उप विजेतामा सीमित बन्यो। मधुवनले ५१ हजार १ सय ११ रुपैयाँ सहित शिल्ड, ट्रफी, मेडल र प्रमाण पत्र प्राप्त गरेको छ।
फाइनल खेलमा बढैयातालका उज्वल घिमिरे उत्कृष्ट गोल रक्षक, मधुवनका शंकर थारु उत्कृष्ट डिफेन्डर, बढैयातालका अरुण चलाउने उत्कृष्ट मिड फिल्डर, बढैयातालकै आशिष सिङ ठकुरी उत्कृष्ट फरवार्ड र उदयमान खेलाडीमा बढैयातालका आलोक थारु घोषित भए।
खेलमा बढैयातालका कृष्ण बहादुर राना भाट सर्वोत्कृष्ट खेलाडी घोषित भए। विभिन्न बिदामा उत्कृष्ट घोषित खेलाडीलाई समान स्वरुप दुई हजार रुपैयाँ प्रमाण पत्र र मेडलबाट पुरस्कृत गरिएको छ।
मयुर यूवा क्लबको खेल मैदान नयाँ बस्तीमा चैत्र ४ देखि सुरु भएको प्रतियोगिता सोमबार सकिएको छ। बढैयाताल गाउँपालिका, वडा नं. ८ कार्यालय र कालिका सामुदायिक पुस्तकालय तथा स्रोत केन्द्रको आयोजना रहेको खेलको जिल्ला फुटबल संघ बर्दियाले समन्वय र बर्दिया एकेडेमी तथा पोलिटेक्निक रिसर्च सेन्टर मुख्य प्रायोजन गरेको हो।
प्रतिक्रिया दिनुहोस !
