विराटनगर : सातौं संस्करणको विराट गोल्डकपको उपाधि हात पार्न विराटनगर सिटी फुटबल क्लब र भारतको केरलास्थित लुका सकर क्लब उत्साहित देखिएका छन् ।
फाइनलमा पुगेका दुवै टिममा उपाधिको नतिजा आफ्नो पक्षमा पार्न बलियो आत्मविश्वास देखिएको हो । विराटनगरमा बुधबार प्रि–म्याच कन्फ्रेन्स गर्दै दुवै टिमले फरक रणनीतिका साथ फाइनल चरणको खेलमा सहभागी हुने तयारी रहेको जनाएको छ ।
भारतबाहिर टुर्नामेन्टमा पहिलोपटक सहभागी भएको लुका सकर क्लब विराट गोल्डकपको उपाधि केरला भित्र्याउने गृहकार्य गरिरहेको छ भने घरेलु टोली बिसीएफसी ६१ वर्षपछि दोश्रोपटक गोल्डकपको उपाधि हात पार्ने दाउमा छ ।
विराटनगर सिटी फुटबल क्लब (बिसीएफसी) पूर्व विजेता टिम नेपाल पुलिस र जावलाखेल युथ क्लबलाई हराउँदै फाइनलमा प्रवेश गरेको हो । लुका सकर भने क्वाटरफाईनलमा संकटा र सेमिफाइनलमा एपीएफलाई पराजित गर्दै फाइनलमा आफ्नो स्थान सुरक्षित गरेको हो । केरलाको लुका सकर क्लब र घरेलु टिम बिसीएफसी पहिलोपटक विराटनगरस्थित सहिद रङ्गशालामा प्रतिस्पर्धा गर्ने भएका छन् ।
साविक विजेता एपीएफ र लिग खेल्दै आएको ‘ए’ डिभिजन संकटाजस्तो सशक्त टिमलाई पराजित गरेर फाइनलको यात्रा तय गरेकाले लुका सकरका खेलाडीहरुमा मनोबल उच्च देखिन्छ । घरेलु टोली पनि तेश्रोपटक आफूलाई प्रतियोगिताको उपाधि नजिक पु¥याएको हुनाले उत्तिकै आत्मविश्वासी देखिन्छन् ।
आयोजक घरेलु टिम ६ दशकपछि तेस्रोपटक गोल्डकपको फाइनलमा पुगेको छ । यसअघि २०१८ सालमा महेन्द्र गोल्डकपको नामले फुटबल प्रतियोगिता हुँदा आयोजक टिम ‘मोरङ ११’ फाइनलमा पुगेको थियो । त्यतिबेला टिमले उप–विजेताको उपाधि हात पारेको थियो । विजेताको उपाधि भने भारतको कलकत्ताले हात पार्न सफल भएको थियो । त्यसपछि २०१९ सालमा भएको गोल्डकपमा आयोजक टिम ‘मोरङ ११’ ले पहिलोपटक विजेताको उपाधि हात पारेको हो । सातौं संस्करणसम्म आइपुग्दा घरेलु टिम जम्मा तेस्रोपटक फाइनलमा पुगेको हो ।
गत वर्षको लिग विजेता मछिन्द्र क्लबको सेटलाई मैदानमा उतारेको आयोजक विराटनगरले सेमिफाइनल खेलबाट बिमल घर्ती मगरलाई पनि मैदानमा ओरालेको छ । घरेलु टिमलाई फाइनलमा पुर्याउन बिमलले महत्वपूर्ण भूमिका खेलका छन् । उनले निकालेको दुवै क्रसपासमा विराटनगरले संकटालाई २–१ गोेलान्तरले पराजित गरेको छ ।
विराटनगरमा बुधबार आयोजित प्रि–म्याच कन्फ्रेन्समा दुवै टिमका प्रशिक्षक र कप्तानले आफूहरु उपाधिका लागि खेल्ने बताएका छन् । विराटनगर सिटीका प्रशिक्षक सन्तोष न्यौपानले गोल्डकपमा टिमको लक्ष्य उपाधि जित्नु रहेको बताए । ‘विराट गोल्डकपको फाईनलमा पुगेका छौं । उपाधि उचाल्ने प्रयास रहने छ,’उनले भने,‘विराटनगरलाई दोस्रोपटक गोल्डकपको उपाधि हामी नै दिलाउने छौं ।’
विराटनगर सिटी फुटबल क्लबका कप्तान विशाल श्रेष्ठले घरेलु दर्शकको साथ र हौसलाले आफूहरू उपाधि नजिक पुगेको दाबी गरे । उनले भने,‘लुका सकर राम्रो टिम हो । अग्ला कद भएका खेलाडी छन् । त्यसैले हामी टेक्निकल खेल प्रर्दशन गर्नेछौं ।’
प्रि–म्याच कन्फरेन्समा बोल्दै भारतको केरलास्थित लुका सकर क्लबका कप्तान अर्सद हामीले नेपालकै प्रतिष्ठित उपाधि उचाल्न आफुहरु निकै उत्साहित रहेको बताए । साविकको विजेता टिमलाई समेत पराजित गर्दै आफूहरु फाइनलमा स्थान पक्का गर्न सफल भएकाले उपाधि हात पार्ने विषयमा कुनै दुईमत नरहेको उनले जिकिर गरे ।
विराटनगरमा गत चैत्र ९ गतेदेखि रात्रीकालीन विराट गोल्डकप सुरु भएको हो । बिहीबार हुने फाइनल खेलमा विजेताको उपाधि हात पार्ने टिमले २० लाख १५ हजार र उप–विजेताले १० लाख १५ हजार रुपैयाँ नगद पुरस्कार प्राप्त गर्नेछन् ।
खेलका प्रशिक्षक, गोलकिपर, मिड फिल्डर, डिफेन्स, फरवार्ड, सर्वाधिक गोलकर्ता, व्यवस्थापक र फेयर–प्ले गरी सबैलाई जनही २५/२५ हजार रुपैयाँ पुरस्कारको व्यवस्था गरिएको आयोजकले जनाएको छ ।
प्रतिक्रिया दिनुहोस !
