हेटौडा : बागमती प्रदेशका आन्तरिक मामिला तथा कानुनमन्त्री गंगानारायण श्रेष्ठले माध्यमिक शिक्षा परीक्षा (एसईई) को आज अनुगमन गरेका छन् । हेटौंडाको आधुनिक राष्ट्रिय मावि र भुटनदेवी माविमा रहेको परीक्षा केन्द्रमा पुगेर मन्त्री श्रेष्ठले परीक्षा केन्द्रको अवस्था, सुरक्षा प्रबन्धलगायत विषयमा जानकारी लिँदै विद्यार्थीलाई परीक्षाको सफलताको शुभकामना दिए ।
मन्त्री श्रेष्ठले परीक्षा अनुशासित, मर्यादित, सुरक्षित र व्यवस्थित रहेकोमा खुसी व्यक्त गर्दै परीक्षा केन्द्राध्यक्षलगायत टिमलाई धन्यवाद दिए । परीक्षालाई प्रभावकारी बनाउन प्रदेश सरकारले सम्बन्धित सबै निकायलाई आवश्यक निर्देशन दिएको उनले बताए ।
त्यस्तै मन्त्री श्रेष्ठले विशेष अवस्थाका परिक्षार्थीलाई समेत हौसला प्रदान गर्दै विद्यालयका नर्सलाई परिक्षार्थीलाई कुनै पनि बेला आवश्यक पर्ने स्वास्थ्य सेवाका बारेमा सचेत रहन सम्बन्धित केन्द्राध्यक्षमार्फत् निर्देशन दिएका छन् ।
चैत २९ गतेसम्म चल्ने यस वर्षको एसईई परीक्षामा करिब ५ लाख परीक्षार्थी सहभागी हुने र त्यसमा बागमती प्रदेशको मात्रै २० प्रतिशत विद्यार्थी सहभागी छन् ।
त्यस्तै एसईई परीक्षाका लागि ७७ जिल्लामा २ हजार ३६ परीक्षा केन्द्रमध्ये सबैभन्दा बढी परीक्षा केन्द्र बागमती प्रदेशमा रहेको जानकारी शिक्षा विकास निर्देशनालयका शाखा अधिकृत विजय विडारीले जानकारी दिए ।
बागमती प्रदेशका १ लाख १ हजार ७३३ परीक्षार्थीका लागि ४३४ परीक्षा केन्द्र रहेको अधिकृत विडारीले बताए ।
प्रतिक्रिया दिनुहोस !
