जोमसोम : मुस्ताङका कृषकलाई ५० प्रतिशत अनुदान सहुलियतमा खेत जोत्ने कृषि यान्त्रिकीकरण उपकरण मिनी पावर ट्रिलर (हाते ट्याक्टर) वितरण गरिएको छ।
प्रधानमन्त्री कृषि आधुनिकीकरण परियोजना, परियोजना कार्यान्वयन इकाई मुस्ताङले जोनमा सूचीकृत कृषि फार्म,समूह र सहकारीलाई हाते ट्याक्टर अनुदानमा दिएको हो।
चालु आर्थिक वर्ष २०७९/०८० मा विनियोजित १८ लाख बजेटमध्येबाट जिल्लाका १२ वटा कृषि फार्म, समूह र सहकारी संस्थालाई अनुदानमा हाते ट्याक्टर वितरण गरिएको परियोजना इकाईले जनाएको छ।
परियोजनाका अनुसार जिल्लाका कृषकले पाउने उपकरण खरिदको अनुदान सुविधा नदोहोरिने गरी हाते ट्याक्टर कृषक समूह, फार्म र सहकारी कृषकलाई उपलब्ध गराएको हो।
मागका आधारमा दिइने यसप्रकार अनुदान सुविधामा दर्जनौं कृषक संस्थाले उपकरण खरिदका लागि परियोजना इकाईमा आवेदन दिएका थिए।
यसअघि अनुदान सुविधा नलिइएकामध्येबाट घरपझोङ गाउँपालिकामा ७ थान, वारागुङ मुक्तिक्षेत्र गाउँपालिकामा ३ थान र थासाङ र लोघेकर दामोदरकुण्ड गाउँपालिकामा समान १/१ थान हाते ट्याक्टर ५० प्रतिशत अनुदानमा वितरण गरिएको परियोजना इकाईका कृषि अधिकृत नेत्रप्रसाद भट्टले जानकारी दिए।
परियोजनाले अनुदानमा उपलब्ध गराएको हाते ट्याक्टर मध्ये ८ वटा डिजेलबाट चल्ने र ४ वटा पेट्रोलबाट चल्ने हाते ट्याक्टर रहेको छ। डिजेलबाट चल्नेको १ लाख २० हजार र पेट्रोलबाट चल्ने हाते ट्याक्टरको प्रति मुल्य ८० हजार पर्छ।
जिल्लाका कृषि फार्म, समूह र सहकारी गरी ९० वटा संस्थालाई खेत जोत्ने हाते ट्याक्टर वितरण भइसकेको र अन्य १४७ वटा कृषि उपकरण वितरण गर्ने तयारी भइरहेको कृषि अधिकृत भट्टको भनाइ छ।
इकाईले अनुदान माग गरी छनौट भएका फार्म, समूह र सहकारीलाई स्याउ टिप्ने र काँटछाँट गर्ने भर्याङ १९ थान, घाँस काट्ने ब्रस कटर ३१ थान, पावर स्प्रे ४० थान, डिजिटल तराजु १८ थान, हाँगाबिगा काँट्ने कैची १४ थान, मोटर स्प्रे ३ थान, सिकेचर करौती ९ थान र फुड ड्राई मेशिन १ थान ५० प्रतिशत अनुदानमा वितरण गरिने कृषि अधिकृत भट्टले बताए।
बर्सेनि यहाँका कृषि फार्म, सहकारी, समूह र प्रालि दर्ता गरेका कृषकलाई स्थानीय तह, कृषि ज्ञान केन्द्र र परियोजना कार्यान्वयन इकाईले अनुदानमा कृषि उपकरण खरिदमा अनुदान दिने गरेको छ।
कृषि यान्त्रिकीकरण उपकरणमा अनुदान पाएपछि जिल्लाका कृषकलाई कृषि कर्म गर्न सहज भएको मार्फाका कृषक दिपक लालचनले जानकारी दिए।
प्रतिक्रिया दिनुहोस !
