'जनप्रतिनिधिकै रोहबरमा हातमुख जोर्ने बाटो बन्द'
खुम्बुमा बाख्रा पालन प्रतिबन्ध, व्यवसायीको लाखौं लगानी संकटमा
चैत ३०, २०७९ बिहीबार ९:१:५३
वडा क्षेत्रमा कतिपय नागरिकहरुको प्रमुख आर्यआर्जनको श्रोत नै बाख्रा पालन भएपनि जनप्रतिनिधिकै रोहबरमा गरिएको यस निर्णयले आफूहरुको हातमुख जोर्ने बाटो नै बन्द हुने स्थितीमा पुगेको उनीहरु बताउँछन्।
सोलुखुम्बु : कृषि तथा पशुपालन मार्फत मुलुकलाई सम्वृद्ध बनाउने संघीय सरकारको नितिविरुद्ध सोलुखुम्बुको खुम्बु पासाङल्हामु गाउँपालिका ३ मा बाख्रापालनमा प्रतिबन्ध गरिएको छ। जिल्ला स्थित कृषिसँग सम्बन्धित कार्यालयबाट अनुदान समेत लिएका तथा गाउँपालिकामै बाख्रा पालन व्यवसाय दर्ता गराएका कृषकलाईसमेत बाख्रा पालनमा प्रतिबन्ध लगाइएको हो।
बाख्रा पालन गर्दा दुर्गन्ध फैलिइ वातावरण प्रदुषित हुनुका साथै उक्त क्षेत्रमा पशु हिंसा निर्मुलीकरणका लागि काटमार समेत निषेधित गरिएको भन्दै वडा नम्बर ३ मा जनप्रतिनिधिकै रोहबरमा उक्त कठोर निर्णय गरिएको हो। खुम्बु पासाङ ल्हामु गाउँपालिका ३ को कोङ्दे मध्यवर्ती क्षेत्र सामुदायिक वन उपभोक्ता समितिले वडाका जनप्रतिनिधिकै रोहबरमा वडा नम्बर ३ मा बाख्रा पालनमा प्रतिबन्ध लगाएको हो।
चैत्र २ गते बसेको जनप्रतिनिधि, प्रहरी प्रशासन, स्थानीय समुहसहितको सामुदायिक वनको बैठकले सो क्षेत्रमा बाख्रा पालन पूर्ण रुपमा रोक लगाउने निर्णय गरेको वनले काटेको पत्रमा उल्लेख छ। उक्त निर्णयले न्यून आयस्तर भएका तथा खसी बाख्रा पालन गरेरै जिविको पार्जन गर्नेहरुलाई गम्भीर असर परेको छ। वडा क्षेत्रमा कतिपय नागरिकहरुको प्रमुख आर्यआर्जनको श्रोत नै बाख्रा पालन भएपनि जनप्रतिनिधिकै रोहबरमा गरिएको यस निर्णयले आफूहरुको हातमुख जोर्ने बाटो नै बन्द हुने स्थितीमा पुगेको उनीहरु बताउँछन्।
स्वतन्त्रता पूर्वक देशभर जनसुकै व्यवसाय गर्ने अधिकार नागरिकलाई हुने भएकाले व्यवसायिक अधिकारमाथि हस्तक्षेत्रप गर्न नहुने सोलुखुम्बुका प्रमुख जिल्ला अधिकारी बसन्त भट्टराईले बताए। खुल्ला अर्थ नीति अपनाएको मुलुकले नागरिकको संविधान प्रदत्त व्यवसाय गर्ने अधिकार कसैले खोस्न नहुने बाख्रा पालन व्यवसायी महासंघका सोलुखुम्बु अध्यक्ष आङ काजी शेर्पाले बताए।
व्यवसाय दर्ता गर्दा वडा तथा पालिकाकै अनुमतिमा लाखौँ अनुदानसमेत लिएर व्यवसाय गरेकाले यस निर्णयले किसान तथा व्यवसायको हितविपरित भएको उनको भनाइ छ। यता खुम्बु पासाङ ल्हामु गाउँपालिका ३ का वडाध्यक्ष नुरु जाङबु शेर्पाले आफ्नो वडामा मात्र नभइ पालिकाभर नै बाख्रा पालनमा प्रतिबन्ध लगाएको बताएका छन्।
यसअघि सो क्षेत्रमा सुङ्गुर पाल्न प्रतिबन्ध लगाएकाले तिनै किसानहरुले बाख्रा पालन गर्न थालेपछि बोट बिरुवामा पुग्न सक्ने क्षतिलाई मध्येनजर गर्दै वडाकै समन्वयमा सामुदायिक वनले बाख्रा पालनमा पनि रोक लगाएको उनले बताए।
प्रतिक्रिया दिनुहोस !
