घराम्दी (म्याग्दी) : म्याग्दीको अन्नपूर्ण गाउँपालिकाले आयोजना गरेको अध्यक्ष कप खेलकुद प्रतियोगिताको उपाधी वडा नम्बर ५ शिखले जितेको छ।
घराम्दीमा शुक्रबार सम्पन्न भएको प्रतियोगिताको चार वटा मध्य दुई वटा खेलमा स्वर्ण र एक वटामा रजत पदक जित्दै शिख च्याम्पीयन भएको हो। नव वर्ष २०८० को अवसरमा चैत २७ गतेदेखि सञ्चालन भएको प्रतियोगितामा वडा नम्बर ४ नारच्याङ एक स्वर्ण र एक रजत पदक जित्दै उपविजेता भएको छ।
बिजेता शिखले महिला भलिबल, पुरुष बास्केटबलमा स्वर्ण र प्रौद्ध भलिबलमा रजत पदक जितेको छ। उपविजेता नारच्याङले पुरुष भलिबलमा स्वर्ण र महिला भलिबलमा रजत पदक जितेको गाउँपालिकाका शिक्षा अधिकृत गणेश कटुवालले जानकारी दिए।
महिला भलिबलमा शिखले नारच्याङलाई १ का विरुद्ध ३ सेटले पराजित गरेको हो। पहिलो, दोस्रो र चौथो सेट शिखले २५–१८, २५–१७, २५–१८ अन्तरले जित्यो। तोस्रो सेटमा नारच्याङले शिखलाई २३–२५ अन्तरले जितेको थियो।
पुरुष वास्केटबलमा शिखले वडा नम्बर ८ राम्चेलाई ६२ का विरुद्ध ७६ स्कोरले जित निकालेको थियो। प्रौद्ध भलिबलमा वडा नम्बर ७ हिस्तानले शिखलाई २ का विरुद्ध ३ सेटले जित्यो। हिस्तानले दोस्रो, तेस्रो र पाँचौ सेट २५–२०, २५–१६ र १५–९ अन्तरले जितेको हो। शिखले पहिलो र चौथो सेट २५–२२ र २०–२५ अन्तरले जित्यो।
पुरुष भलिबलमा नारच्याङले वडा नम्बर ६ घारलाई १ का विरुद्ध ३ सेटमा पराजित गर्यो। नारच्याङले दोस्रो, तेस्रो र चौथो सेट २५–११, २५–२२ र २५–१९ अन्तरले जितेको छ। पहिलो सेट घारले नारच्याङलाई २६–२४ अन्तरले जितेको थियो।
पाँच दिनसम्म सञ्चालन भएको प्रतियोगितामा पुरुष, महिला भलिबल, पुरुष वास्केटबल र प्रौद्ध भलिबल खेलमा ८ वटा वडाबाट छनौट भएका खेलाडीहरु सहभागी भएका थिए। प्रत्येक बिधामा प्रथम र दृतीय हुने वडाले रु. ३० हजार र २० हजारका दरले पुरस्कार प्राप्त गरेका प्रमुख प्रशासकीय अधिकृत अमृत सुवेदीले जानकारी दिए।
खेलाडी सहभागिताका लागि प्रत्येक वडालाई ५० हजारका दरले अनुदान दिइएको थियो। वास्केटबलमा शिखका निर्मल पाईजा, पुरुष भलिबलमा नारच्याङका सुविन चोचाङ्गी, महिला भलिबलमा शिखका मनिषा पुन र पौद्ध भलिबलमा हिस्तानका याम बहादुर पुनलाई उत्कृष्ट खेलाडी घोषणा गरिएको थियो।
बिजेता र उपबिजेतालाई गाउँपालिकाका अध्यक्ष भारतकुमार पुन, उपाध्यक्ष दिवा तिलिजा पुन, प्रमुख प्रशासकीय अधिकृत अमृत सुवेदी, वडा अध्यक्ष मइलन पुर्जा, रामबहादुर खड्का, लोकबहादुर फगामी, राजेश तिलिजाले कप, मेडल, प्रमाणपत्र र पुरस्कार वितरण गरेका थिए।
‘अध्यक्ष कप प्रतियोगिता मार्फत गाउँपालिकाले व्यवस्थित र समय तालिका अनुसार खेल सञ्चालन गर्ने हो भने समयमै सम्पन्न गर्न सकिने सन्देश दिन सफल भएका छौं,’ अध्यक्ष पुनले भने, ‘खेलकुदको विकासका लागि प्रतियोगिताहरुलाई व्यवस्थित र सुरक्षित बनाउनुपर्छ।’
प्रतियोगिता समापन समारोहमा हिस्तानकी महिला भलिबल खेलाडी सजिना बुढाथोकीलाई हाल बेलायतमा रहनुभएका घराम्दीका धनबहादुर पाईजाले व्यक्तिगत रुपमा २५ हजार प्रोत्साहन रकम प्रदान गरेका थिए।
यसैगरी हिस्तानको महिला भलिबल टिमलाई वडा कार्यालयबाट १५ हजार र टोलहरुबाट ३० हजार गरि एकमुष्ट ४५ हजार प्रदान गरिएको थियो। नवौ राष्ट्रिय खेलकुद प्रतियोगितामा सहभागि भएका अन्नपूर्ण गाउँपालिकाका महिला भलिबल खेलाडी शस्मी पुन, मनिषा तिलिजा र पुरुष वास्केटबलका खेमराज पुनलाई पाँच-पाँच हजारका दरले सम्मान गरेका थिए। गाउँपालिकाले उनीहरुलाई खादा ओडाएर सम्मानपत्र प्रदान गरेको थियो।
सोही अवसरमा भएको नृत्य प्रतियोगितामा घराम्दीका एन्जल राम्जाली प्रथम, नागीका सिमा पुर्जा दृतीय, घराम्दीका उत्तम पुर्जा र नागीका नानुमाया पुन तृतीय हुनुभएको थियो। नृत्यमा प्रथम, दृतीय, तृतीय हुनेलाई बेलायतबाट धनबहादुर पाईजाले पठाएको क्रमश पाँच हजार, चार हजार र पन्ध्र-पन्ध्र सय प्रदान गरिएको थियो।
प्रतिक्रिया दिनुहोस !
