औषधि व्यवस्था विभागले ताला लगाएको सल्लेरी मेडिकल हलले खुलेआम औषधि बेच्दै

सोलुखुम्बु :औषधि व्यवस्था विभाग विराटनगरले ताला लगाएको सोलुखुम्बुको सदरमुकाम सल्लेरीमा सञ्चालित एक औषध पसलले खुलमखुला औषधि बिक्री गरिरहेको पाइएको छ । विभागले गत चैत्र २३ अनुगमनको क्रममा विभिन्न कम्जोरी औंल्याई तत्काललाई औषधि बिक्री गर्न रोक लगाउँदै ताला लगाएको सल्लेरी मेडिकल हलले अहिले निर्वादरुपमा औषधि बिक्री गरिरहेको पाइएको हो ।

अनुगमनको क्रममा करिब ४ वर्षदेखि फार्मेसी नविकरण नगरेको तथा औषधि पसलबाटै निर्माण सामग्रीदेखि किराना सामान समेत राखेर बिक्री गरेको पाइएकाले औषधि पसलमा विभागले ताला लगाएको थियो । सबै सामग्रीहरु एकै ठाउँ राखेर बिक्री गर्न नपाउने प्रावधान भएपनि सल्लेरी मेडिकल हलले त्यसको पटकपटक अवज्ञा गर्दै एकै स्थानबाट सबै सामग्री बिक्री गरिरहेको पाइएको विभागले जनाएको छ । 

उक्त कमजोरी सुधार गर्न पटक पटक समय दिँदा समेत अटेर गरेकाले विभागमा उपस्थित हुन ७ दिने अल्टिमेटमसहित चैत्र २६ गते औषधि पसलतर्फको द्वारमा ताला लगाइएको फार्मेसी निरीक्षक दिपेन्द्र खड्काले बताए । 

साथै उक्त फार्मेसीले २०७५ सालपछि दर्ता समेत नविकरण नगरेको पाइएको विभागले जनाएको छ । तर औषधि पसल तर्फको ढोकामा ताला लगाएपनि अर्को तर्फको ढोका प्रयोग गरी उक्त फार्मेसीले औषधि बिक्री गरिरहेको तथ्य फेला परेको हो ।

यता विभागले भने उक्त फार्मेसी सम्पर्कमा समेत नआएको बताएको छ । फार्मेसीको नविरकण समेत फेल भइसकेको र आफूहरूले पसल सञ्चालक भगवती गुरुङ (बज्राचार्य) लाई पटक पटक ताकेता गर्दा समेत सम्पर्कमा नआएको औषधि व्यवस्था विभागका प्रमुख टेकेन्द्र मिश्रले बताए । 

उनले भने,‘अब हामीले पटक पटक सचेत गराउँदा समेत सल्लेरी मेडिकल हलले हटेर गरेको छ,नागरिकको स्वास्थ्यमाथि खेलबाड गर्ने छुट कसैलाई छैन यो गर्न पाइदैन् । औषधि पसलको लाइसेन्स चुस्तदुरुस्त भएको खण्डमा त्यहि अनुसार कारबाही प्रकया अघि बढ्थ्यो अब त्यो अवस्था पनि भएन।यस्तो अवस्थामा अब प्रहरीको सहायता लिएर सञ्चालकलाई नै पक्राउ गर्न लगाउनुको विकल्प छैन् । हामी त्यहि अनुसार अघि बढ्छौं ।’