धनगढी : यसपालि धनगढी उपमहानगरपालिकाले आफ्नै निगरानीमा गरेको आधारभूत तहको परीक्षा र मूल्यांकनमा वडा नम्बर ५ मा रहेको पञ्चोदय मावि हसनपुर पहिलो र वडा नम्बर ३ मा रहेको त्रिभुवन मावि बोराडाँडी दोस्रो भएको छ।
यसपालिको नतिजामा पञ्चोदय मावि हसनपुर धनगढीको सबैभन्दा बढी ५१ प्रतिसत विद्यार्थी पास भएका छन्। पञ्चोदयबाट २ सय ३५ जनाले आधारभूत तहको परीक्षा दिएकोमा १ सय २१ जना विद्यार्थी पास भएका छन्। ‘पालिका भरमा यो नतिजा पहिलो हो’, धनगढी उपमहानगरपालिकाका विद्यालय निरीक्षक अकबर चन्दले भने।
यस्तै धनगढीको वडानम्बर ३ मा रहेको त्रिभुवन मावि दोस्रो भएको छ। यस विद्यालयबाट ८२ जनाले आधारभूत तहको परिक्षा दिएकोमा २४ जना पास भएका छन्। यो २९ प्रतिशत नतिजा हो। ‘नतिजामा चित्त त बुझेको छैन, तर पालिका भरी हाम्रो विद्यालय दोस्रो स्थानमा आएको छ’, त्रिभुवन मावि बोराडाँडीका प्रधानाध्यापक सीताराम अवस्थीले भने।
पञ्चोदय मावि र त्रिभुवन माविमा अंग्रेजी र नेपाली दुवै माध्यममा पढाइ हुन्छ। सामुदायिक विद्यालयतर्फ वडा नम्बर १६ मा रहेको शिव मावि रामपुरको १३ प्रतिशत, वडा नम्बर १३ मा रहेको जनता राष्ट्रिय मावि कैलाली गाउँको १२ प्रतिसत र वडा नम्बर १४ मा रहेको पञ्चोदय मावि बी गाउँको १० प्रतिसत नतिजा आएको छ। यी विद्यालयहरू क्रमशः तेस्रो चौथो र पाँचौं भएका छन्।
प्रतिक्रिया दिनुहोस !
