बेनी : म्याग्दीको पर्यटकीय स्थल घोडेपानी, पुनहिल, खोपारा र मोहरेडाडामा सोमबार हिमपात भएको छ।
समुन्द्री सतहदेखि दुई हजार आठ सय मिटरमा अवस्थित घोडेपानीसँगै अन्नपूर्ण गाउँपालिकाको पर्यटकीय स्थलहरू खोपारा, पुनहिल र मोहरेडाडा हिउँले ढाकिएको छ।
अन्नपूर्ण चक्रीय पदमार्गको प्रमुख पर्यटकीय गन्तव्य मानिएको घोडेपानी–पुनहिल म्याग्दीको अन्नपूर्ण गाउँपालिकाको वडा नम्बर ६ मा पर्छ। सोमबार अपराहन्नदेखि हिउँ पर्न थालेको घोडेपानीका होटल व्यवसायी सपना गुरुङले बताइन्।
समुन्द्रि सतहदेखि तीन हजार छ सय मिटर उचाइएको खोपारा अन्नपूर्णको ५ र तीन हजार ३०० मिटर उचाइको मोहरेडाडा ८ नम्बर वडामा पर्छ।
'दिउँसो १२ बजेबाट पानी पर्न थालेको थियो,' गुरुङले भनिन् 'साँझदेखि जमिनमा हिउँ जम्न थालेको छ। गाउँ र वरपरका पहाड सेताम्मे भएका छन्।'
बेमौसमी हिमपातले चिसो बढाए पनि भ्रमणमा आएका पर्यटकहरूले रमाइलो मानेका छन्। हिउँ खेल्न पर्यटकहरू आउने र चहलपहल बढ्ने घोडेपानी होटल व्यवस्थापन उपसमितिका अध्यक्ष मिना पुनले बताइन्। वसन्त ऋतुमा बेमौसमी हिमपात भएको हो।
यसपाली पुस र माघमा हिमपात भएन। हिउँद सकिएपछि फागुनको पहिलो सातादेखि हिउँ पर्न थालेको थियो।
हिउँदको खडेरी र वसन्त ऋतुको सुरुवातसँगैको वर्षातका कारण घोडेपानी क्षेत्रमा यसपाली गुराँस कम फुलेको स्थानीयवासी समेत रहेका अन्नपूर्ण गाउँपालिकाका पूर्व अध्यक्ष डमबहादुर पुनले बताए।
‘फागुन, चैत र वैशाख महिनामा भएको बेमौसमी हिमपातले गुराँस चाँडै निख्रियो,’ उनले भने ‘गुराँस नफुल्नु, फुलेका पनि चाँडै निख्रिनु र बेमौसममा हिमपात हुन तापक्रम वृद्धि र जलवायु परिवर्तनको अवसरका रूपमा लिएका छौं।’
प्रतिक्रिया दिनुहोस !
