उत्तरी गोरखाको नाम्रुङ र चुम्लिङमा खाद्य व्यवस्थाको बिक्री केन्द्र राखिने
वैशाख १३, २०८० बुधबार १२:५७:१८
गोरखा : उत्तरी गोरखाको नाम्रुङ र चुम्लिङमा खाद्य व्यवस्था तथा व्यापार कम्पनीको बिक्रीकेन्द्र सञ्चालन गर्ने निर्णय भएको छ । गत बैशाख ३ गते आपूर्ति मन्त्रालय र कम्पनीको बोर्ड बैठकले चुमनुब्री गाउँपालिका वडा नं.१,२,४ र ५ का बासिन्दाका लागि वडा नं. ४ को नाम्रुङमा र वडा नं. ६ र ७ का बासिन्दाका लागि वडा नं. ६ चुम्लिङका लागि बिक्रीकेन्द्र राख्ने निर्णय गरेको हो ।
सडक सञ्जालले नछोएका दुर्गमबस्तीका बासिन्दालाई खाद्यान्नको समस्या हुन नदिनका लागि दुई ठाउँमा बिक्रीकेन्द्र सञ्चाल नगर्ने निर्णय गरेको कम्पनीको शाखा कार्यालय गोरखाका प्रमुख मुनिलाल कुशवाहले जानकारी दिए ।
‘निर्णय बैशाख ३ गते भए पनि हामीलाई सोमबार मात्र परिपत्र आयो,'कुशवाहले भने,‘कम्पनीको गोरखा शाखाले जिल्ला स्तरीय विपत व्यवस्थापन समितिसँग सिफारिस लिई बारम्बार पहल गरिरहेका थियौं । हामीले त डिपोका लागि पहल गरेका थियौं तर विक्री केन्द्र भनेर स्वीकृति भएछ ।’
ती दुबै डिपोमा पाँच–पाँचसय क्वीण्टल चामल पठाउने तयारी गरिरहेको उनले बताए । ‘बर्खा सुरु हुनअघि नै पाँच–पाँचसय क्वीण्टल चामल सम्बन्धित बिक्री केन्द्रमा पुर्याउँछौं,'शवाहले भने, ‘हाम्रा ठेकेदार जान्छन् । जनप्रतिनिधिसित मिलेर चामल बेच्छन् र पैसा कम्पनीलाई बुझाउँछन् ।’
हाल यी दुवै केन्द्रमा सोनामन्सुली चामल प्रतिबोरा(३० किलो) १८ सय र जिरा मसिनो चामल प्रतिबोरा(२५ किलो)को २२ सय रुपैयाँमा बिक्री गरिने उनले बताए । गोरखामा सिर्दिबासको फिलिम र धार्चेको माछाखोलामा खाद्य डिपो छन् ।
माछाखोलाका लागि पाँचसय क्वीण्टल र सिर्दिबासका लागि यो वर्षका लागि ३५ सय क्वीण्टल चामल ढुवानी गर्न ठेक्का लागि सकेको छ । ठेक्का भएकामध्य सिर्दिबासका लागि २७ सय क्वीण्टल ढुवानी भइसकेको छ । माछाखोला डिपोमा भने चामल बिक्री नभएका कारण नओसारिएको कुशवाहले बताए । त्यहाका लागि ६५ क्वीण्टल मात्र पठाएको र त्यो पनि बिक्री नभएको उनको भनाइ छ ।
आफूहरुले डिपो माग गरेको तर सरकारले बिक्रीकेन्द्र मात्र दिएको भन्दै वडा अध्यक्षहरूले गुनासो गरेका छन् । ‘गोदाम होस्, त्यहाँ कम्पनीका कर्मचारी होउन् । यो दिनमा बाँड्ने भएनेपछि कम्पनीका कर्मचारी जाउन्, बेचुन् । हामीले यस्तो खालको संरचना माग गरेका थियौं,' वडा नं. ६ का अध्यक्ष सरोज लामा भन्छन्,‘तर अहिले भनेसुने अनुसार हामीले कुन घरलाई कति चामल चाहिएको छ भनेर तथ्यांक संकलन गर्ने, पैसा पनि उठाउने र कार्यालयलाई बुझाएपछि मात्र चामल पठाउने रे । यस्तो त हामीले माग गरेको होइन । यस विषयमा कार्यालयले हामीसित सरसल्लाह पनि गरेको छैन ।’
गाउँलेहरूसित पैसा उठाएर कम्पनीलाई बुझाउने काम वडा कार्यालयले गर्न नसक्ने उनको भनाइ छ । आफ्नो वडाको वडा कार्यालय गपमा रहेको र केन्द्र पनि गपमा पर्ने हुँदा खाद्यको इकाइ गपमा राख्नुपर्छ भन्ने आफूहरूको माग नसुनी एकातर्फी निर्णय गरेको भन्दै वडा नं. ४ का वडाअध्यक्ष पेमा ग्याल्बो लामाले गुनासो गरेका छन् ।
कम्पनीका गोरखा कार्यालय प्रमुख कुशवाहले भने यो प्रारम्भिक चरण भएकाले केही कठिनाइ आए पनि आपसी समन्वयमा समाधान गर्दै जाने विश्वास व्यक्त गरेका छन् ।
प्रतिक्रिया दिनुहोस !
