जोमसोम : उत्तरी चीनको स्वशासित क्षेत्र तिब्बतसँग सीमाना जोडिएको उपल्लो मुस्ताङको लोमान्थाङ गाउँपालिका अन्तर्गतका ३,४ र ५ वडा जोड्ने रिङरोड सडक स्तरोन्नतिको कार्य सुरु गरिएको छ। गण्डकी प्रदेश सरकारको समपूरक बजेट ५० लाख र गाउँपालिकाको ७० लाख बजेट साझेदारी रहने गरी डकारताङ, नाम्गेल, फुवा हुँदै किम्लिङ जोड्ने ४ दशमलव ५ किलोमिटर रिङरोड सडक स्तरोन्नति सुरु गरिएको हो।
चालु आर्थिक वर्ष २०७९-०८० का लागि गण्डकी प्रदेश र स्थानीय तहको ५०÷५० प्रतिशत साझेदारी रहने भनिए पनि त्यसमा थप २० लाख बजेट गाउँपालिकाले विनियोजन गरेको हो। गाउँपालिकाले लोमान्थाङका ४ वटा गाउँ जोड्ने रिङरोड सडक स्तरोन्नतिका लागि फागुन महिनामा १ करोड १६ लाखमा दामोदरकुण्ड कन्ट्रक्सनसँग ठेक्का सम्झौता गरेको प्रमुख प्रशासकीय अधिकृत बुद्धिराम उपाध्यायले जानकारी दिए।
लोमान्थाङका ३ वडाका ४ गाउँ जोड्ने कच्ची सडकलाई फराकिलो बनाउँने, ग्रेड मिलान गर्ने, मेशिनरी वाल र ड्रेन लगायतका कामहरू गरी सडक स्तरोन्नति गरिने प्रशासकीय अधिकृत उपाध्यायले बताए। यसका लागि शुक्रबारदेखि निर्माण कम्पनी सडक स्तरोन्नति कार्यमा खटिएको र सडक ७ मिटर चौडा हुने उनले उल्लेख गरे। सडक स्तरोन्नति चालू आर्थिक वर्षको असार मसान्तभित्र सक्ने लक्ष्य छ।
गण्डकी प्रदेश र पालिकाको संयुक्त साझेदारीमा सीमावर्ती गाउँ जोड्ने रिङरोड सडक स्तरोन्नति थालिएको गाउँपालिकाका अध्यक्ष टसीनर्बु गुरुङले जानकारी दिए। यसअघि सडकको पहुँच पुगे पनि सडक साँघुरो र अप्ठ्यारो थियो, जसका कारण सवारी साधन आउजाउमा समस्या छ,’ अध्यक्ष गुरुङले भने, ‘यसैले हामीले ४ गाउँ जोड्ने सडकलाई प्राथमिकता दिएका हौं, सडक स्तरोन्नति सकिएपछि ४ गाउँका झन्डै २ सय धुरीलाई आउजाउ र मालसामान ढुवानीमा सहज हुनेछ।
उपल्लो मुस्ताङको लोमान्थाङबाट ४ गाउँका स्थानीय कृषि र पशुपालन व्यवसायमा आ िश्रत छन्। सडक बनेपछि उपल्लो मुस्ताङ घुम्न आउने पर्यटकलाई सीमावर्ती गाउँसम्म पुग्न समेत सहज हुनेछ।
प्रतिक्रिया दिनुहोस !
