इलाम : सन्दकपुर गाउँपालिका–३ सुलुबङका लुमणी पाठक (लोकु) को आँगनमा बिहीबार हुने जेठी छोरीको विवाहको चहलपहल थियो। बुधबारको मध्यान्नमा गाउँलेहरू विवाहको तयारीमा थिए।
भट्टीचुल्होमा सेल रोटी पाक्दै थियो। ग्यास चुलोबाट सुरु भएको आगोले विवाहको तयारी मात्रै रोकेन, पाठक परिवारलाई छानोविहीनसमेत बनायो। पाठककी जेठी छोरी पुजाको विवाहको सम्पुर्ण तयारी पूरा भएको थियो। दुखेसो पोख्दै पाठकले भने, ‘कागजात भएको एउटा दराज बाहेक केही पनि रहेन।’
करिव २० मिनेटको आगोले सबै सकिएको स्थानीय देवेन्द्र सुवेदीले बताए। उनले भने, ‘तुरुन्त पुगेर प्रयास गर्दा पनि २० मिनेटमा सबै सकियो।’
पाठकका अनुसार आगलागीको कारण घरमा रहेको सबै सामान खरानी भएपछि विवाह स्थगित भएको छ। उनले सुनाए, ‘केही बाँकी रहेन केले गर्नु विवाह।’ उनको तीन तले काठको घर जल्दा ४० लाखबढी क्षति भएको उनले बताए। पाठकले भने, ‘गाडी खेपेर कमाएको सबै सकियो।’
प्रतिक्रिया दिनुहोस !
