सिन्धुली : जिल्ला प्रहरी कार्यालय सिन्धुलीले चुत्रोको जरासहित तीन ट्रक र चालकलाई नियन्त्रणमा लिएको छ । ओखलढुंगाबाट सिन्धुलीतर्फ आउँदै गरेका तीनवटा ट्रकलाई कमलामाई नगरपालिका ४ हिरापानीमा चेकजाँच गर्नेक्रममा इजाजत पत्रमा उल्लेख गरेको भन्दा दोब्बर चुत्रोको जरा लोडगरी ल्याएको पाइएपछि चालकसहित नियन्त्रणमा लिइएको हो ।
जिल्ला प्रहरी कार्यालय सिन्धुलीका प्रहरी नायव उपरीक्षक चिरन्जिवी दाहालका अनुसार बागमती प्रदेश ०१–००६ ख ३५४८, ०१–००६ ख ११०८ र बा ५ ख ४६४१ नम्बरको टकमा २४ हजार २० केजी चुत्रोको जरा लोड गरी ल्याइएको थियो ।
डिभिजन वन कार्यालय ओखलढुंगाको स्थानान्तरण इजाजत पत्रमा १२ हजार ५ सय केजी र दरपिटमा ११ हजार ५ सय केजी मात्र उल्लेख गरेको भएपनि तीनवटा ट्रकको कूल तौल १२ हजार ५ सय २० केजी बढी देखिएको दाहालको भनाइ छ ।
‘प्रहरीले ट्रक चेकजाँच गर्नेक्रममा शंका लागि नजिकै नाप तौल गर्दा स्वीकृतिभन्दा १२ हजार ५ सय केजी चुत्रो बढी लोड गरी अवैधरुपमा निकासी गर्न लागेको पुष्टि भएको हो,’उनले भने ।
तीनवटै ट्रकमा तौल फरक परेपछि चालक खिजिदेम्बा गाउँपालिका १ ओखलढुंगाका ४३ वर्षीय बलराम सुनुवार, सोही गाउँपालिका ४ का ३४ वर्षीय शन्तलाल तामाङ र खाँडादेवी गाउँपालिका ४ रामेछापका ४८ वर्षीय शम्भु आछामेलाई नियन्त्रण लिएर अनुशन्धानका लागि डिभिजन वन कार्यालय सिन्धुलीमा जिम्मा लगाइएको उनको भनाइ छ ।
उता अवैध चुत्रोको जरासहित नियन्त्रणमा लिइएको ट्रक र चालकका विषयमा अनुशन्धान सुरू गरिएको डिभिजन वन कार्यालय सिन्धुलीले जनाएको छ ।
प्रतिक्रिया दिनुहोस !
