प्रधानमन्त्रीलाई ओलीको प्रश्न : दातृ निकायको बैठकमा राजस्व संकलन गर्न कठिनाई भयो भन्न मिल्छ ?

काठमाडौं : नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल ‘प्रचण्ड’ले अन्तर्राष्ट्रिय समुदायसँगको बैठकमा राजस्व संकलन कठिनाई भएको भनेको भन्दै आपत्ति जनाएका छन् । आइतबार प्रतिनिधि सभा बैठकमा बोल्दै एमाले अध्यक्ष ओलीले दातृ निकायको ब्रिफिङमा देशको राजस्व संकलन गर्न कठिनाई भइरहेको भन्ने मिल्छ भन्दै प्रश्न गरेका हुन् ।

ओलीले भने,‘अन्तर्राष्ट्रिय समुदायसँगको बैठकमा प्रधानमन्तीज्यूले राजस्व संकलन कठिनाई भएको भन्न मिल्छ । यो सरकारको नीति तथा कार्यक्रम असफल दस्तावेज हो । सरकार समस्या समाधानका लागि बनेको हो । समस्यालाई दोष लगाएर सरकार उम्कीन मिल्दैन ।’

ओलीले प्रधानमन्त्रीको भारत भ्रमणमा भारतसँग खुलस्त कुरा राख्नुपर्ने बताए । ओलीले भने,‘प्रधानमन्त्रीज्यू केहिदिनमै भारत भ्रमण गर्दै हुनुहुन्छ । भारत मित्र राष्ट्र हो । भारतसँग खुलस्त कुरा राख्नुपर्छ । काँतरमन र चिसोपन राख्नुहुँदैन । आफ्ना इस्सीयू खुलेर राख्नुपर्छ । मित्रसँग मित्रतापूर्ण ढंगले आफ्ना कुरा राख्नुपर्छ । राष्ट्रिय हितका मुद्दामा खुलस्त रुपमा प्रधानमन्त्रीज्यूले राख्नुपर्छ । प्रधानमन्त्रीज्यूले लिम्पीयाधुरा,कालापानी र लिपुलेकबारे खुलेर कुरा राख्नुपर्छ । कालापानी क्षेत्रमा नयाँ संरचना बन्दै गरेको समाचार आइरहेको छ ।’