वीरगन्ज : भारतसँग सीमा जोडिएको पर्साको भिस्वा नाकाबाट प्रहरीले ठूलो परिमाणमा लागु औषधसहित बसका चालक र सहचालकलाई पक्राउ गरेको छ ।
पर्साको छिपहरमाई गाँउपालिका-५ भिस्वास्थित नेपाल-भारत सीमानाका नजिकै पार्किङ गरी राखिएको प्रदेश ०३-००१ख १८१० नम्बरको देवी ट्राभल्स बसबाट प्रहरीले लागू औषधसहित उक्त बसका चालक र सहचालकलाई पक्राउ गरेको हो ।
पक्राउ पर्नेमा बसका चालक दोलखाको भिमेश्वर नगरपालिका ८ का ४२ वर्षीय दुर्गाराज खत्री र सहचालक पर्साको धोबिनी गाँउपालिका ४ का नुरेश मियाँ तेली रहेका छन् ।
प्रहरीका अनुसार गोप्य सुचनाका आाधारमा सोमबार साँझ प्रहरी चौकी भिस्वाबाट खटिएको प्रहरी टोलीले यात्रु लिएर काठमाडौं जान तयारीमा रहेको उक्त बसमा चेकजाँच गरेको थियो । त्यसक्रममा बसको डिक्की खोलेर खानतलासी गर्दा डिक्कीभित्र रहेको प्लास्टिकको बाल्टीमा कागजले बेरेर राखिएको अवस्थामा लागु औषध फेनरागन ५ सय पिस , डाइजेपाम ५ सय पिस र नोर्फिन ५ सय पिस बरामद भएको हो ।
बससहित चालक खत्री र सहचालक तेलीलाई नियन्त्रणमा लिइएको पर्साका प्रहरी नायब उपरीक्षक दिपक गिरिले जानकारी दिए। उनीहरुलाई इलाका प्रहरी कार्यालय पोखरियाको हिरासतमा राखेर थप अनुसन्धान भइरहेको उनले बताए ।
प्रतिक्रिया दिनुहोस !
