काठमाडौं : सरकारले भन्सार प्रतिनिधिको व्यवस्था खारेज गरेको छ। आर्थिक ऐनमार्फत् भन्सार ऐन संशोधन गर्दै आयात निर्यात कार्य व्यवसायीको भन्सार एजेन्टले मात्र गर्न पाउने व्यवस्था गरेको हो।
अनुमतिप्राप्त भन्सार एजेन्टले २ जनाको दरले भन्सार प्रतिनिधि राख्न पाउने व्यवस्था थियो। ऐन संशोधन भएसँगै अब प्रतिनिधि भन्ने पद नै नहुने भएको हो।
भन्सार ऐनको दफा ५१ मा आयात निर्यात हुने मालवस्तु भन्सार छुटाउन वा भन्सार कार्यालयसँग सम्बन्धित कामको लागि भन्सार एजेन्टलाई आधिकारिक व्यक्ति तोकेपछि एजेन्टले आफैं वा आफ्नो प्रतिनिधिमार्फत् व्यवसायीको काम गरिदिन पाउँथ्यो। उनीहरुले भन्सार विभागबाट अनुमति लिनुपर्छ।
समयक्रममा भन्सार एजेन्टको लाइसेन्स खारेज हुँदैगर्दा र निधन हुँदै गर्दा १ सय ७० एजेन्ट बाँकी रहेपछि भन्सार विभागले ६६० जना एजेन्ट थप गरेको थियो। अहिले करिब ८ सय एजेन्ट र १६ सय प्रतिनिधि कार्यरत रहेकामा ऐन संशोधन भएपछि ८०० जनाले मात्र काम गर्नेछन्।
प्रतिक्रिया दिनुहोस !
