डोटी : प्रधानमन्त्री पुष्पकमल दाहाल प्रचण्ड खप्तड आउँदैछन्। सुदूरपश्चिमको प्रमुख पर्यटकीयस्थल खप्तडमा पहिलो पटक हुन लागेको अन्तर्राष्ट्रिय आध्यात्मिक सम्मेलनको उद्घाटन गर्न प्रधानमन्त्री खप्तड आउन थालेका हुन् ।
सुदूरपश्चिम प्रदेश सरकार तथा खप्तड पर्यटन विकास तथा व्यवस्थापन समितिको आयोजनमा खप्तड क्षेत्रमा यही जेठ २३, २४ र २५ गते सम्मेलन हुन लागेको हो।
आन्तरिक एवं बाह्य पर्यटकलाई बढुवा दिन सम्मेलनको आयोजना गरिएको खप्पड विकास तथा व्यवस्थापन समितिले जनाएको छ।
सम्मेलनमा भारतबाट योगगुरु बाबा रामदेव आउने कार्यक्रम रहेको छ । सम्मेलनमा भारतीय योगगुरु बाबा रामदेवसँगै बालकृष्ण आचार्यको पनि सहभागिता रहनेछ। तीन दिनसम्म चल्ने सम्मेलनका लागि मुख्यमन्त्रीको संयोजकत्वमा ४०१ सदस्यीय मूल तयारी समिति समेत गठन भएको छ। ्
सो समितिअन्तर्गत १२ उपसमिति गठन गरिएका छन् । यसैगरी सम्मेलन आयोजनाका लागि प्रदेश सरकारअन्तर्गत रहेको खप्तड क्षेत्र पर्यटन विकास तथा व्यवस्थापन समितिका अध्यक्ष हर्कबहादुर सिंहको संयोजकत्वमा तयारी तथा व्यवस्थापन समिति गठन गरिएको छ ।
खप्तड क्षेत्रमा खप्तड बाबाले पाँच दशकसम्म साधना गरेका थिए। सो क्षेत्रमा खप्तड बाबाको कुटी,सहस्त्र लिङ्ग, विभिन्न २२ पाटन,५३ झोती (टापु) लगायतका आकर्षक संरचना छन् । खप्तड राष्ट्रिय निकुञ्जसमेत रहेको सो क्षेत्र झण्डै २२५ वर्ग किलोमिटरमा फैलिएको छ ।
खप्तडमा अहिलेसम्म सडक मार्ग भने पुग्न सकेको छैन । डोटीको झिग्रानासम्म यातायातको व्यवस्था भए पनि त्यहाँबाट करिब ४ घण्टाको पैदल यात्रपछि मात्र खप्तड पुगिन्छ ।
प्रतिक्रिया दिनुहोस !
