सुनकोशी दुर्घटना : गाडीसहित दुई जनाको शव फेला, एक जना अझै बेपत्ता
जेठ २३, २०८० मंगलबार १८:४५:२७
सिन्धुली : सुनकोशी नदीमा बेपत्ता भएको गाडी भेटिएको छ। सशस्त्र प्रहरीका प्रवक्ता राजेन्द्र खड्काले गाडीसहित दुई जनाको शव फेला परेको पुष्टि गरेका छन्। घटनास्थलबाट दुई सय मिटर तलतिर शवसहितको गाडी भेटिएको उनले बताए। एक जनाको शव भने अझै बेपत्ता रहेको छ।
पाँच दिनअघि जीपसहित नदीमा खसेर प्राविधिक शिक्षा तथा व्यावसायिक तालिम परिषद् (सिटिइभिटी)का अधिकारीहरू बेपत्ता भएका थिए। सशस्त्र प्रहरीको गोताखोर टोलीले शवसहितको गाडी फेला पारेको प्रवक्ता खड्काले बताए।
भक्तपुरबाट खोटाङतर्फ जाँदै गरेको सिटिइभिटीको गाडीमा प्रशासन शाखाका निर्देशक कृष्ण केसी, योजना महाशाखा निर्देशक यमप्रसाद भुर्तेल र इलामका विद्युत् प्राविधिक भानु पौडेल सवार थिए। उनीहरू पाँच दिनदेखि बेपत्ता थिए। चालक कृष्ण चौधरी घाइते अवस्थामा आफैँ पौडिएर निस्किएका थिए।
बा१झ ७४६७ नम्बरको गाडी शुक्रबार दिउँसो मध्यपहाडी लोकमार्गको खुर्कोट-घुर्मी खण्डअन्तर्गत गोलन्जोर गाउँपालिका-७ को लौकुनबाट सुनकोशी नदीमा खसेको थियो।
प्रतिक्रिया दिनुहोस !
