गुलरिया : जिल्ला ट्राफिक प्रहरी कार्यालय बर्दियाले राजमार्गमा चल्ने सवारी साधनका चालकहरुको स्वास्थ्य परीक्षण गरेको छ । जिल्ला ट्राफिक प्रहरी कार्यालय बर्दियाको आयोजना तथा फत्तेवाल आँखा अस्पताल नेपालगञ्ज र आधारभुत नगर अस्पताल ठाकुरबाबा भुरीगाउँको सहकार्यमा सवारी चालकहरुको प्रारम्भिक स्वास्थ्य परीक्षण गरिएको हो ।
सवारी दुर्घटना न्युनिकरण गर्न बर्दियाको पूर्व पश्चिम राजमार्गमा चल्ने विभिन्न सवारी साधनका १ सय ७८ जना चालकहरुको स्वास्थ्य परिक्षण गरिएको जसमध्ये ५२ जना चालकमा स्वास्थ्य समस्या देखिएको जिल्ला ट्राफिक प्रहरी कार्यालय बर्दियाका हवल्दार कृष्ण डाँगीले बताए । स्वास्थ्य परीक्षणका क्रममा ३५ जना ब्लड प्रेसरका बिरामी तथा १७ जना आँखा सम्बन्धी समस्या भएका चालकहरु पाइएको उनको भनाई छ ।
प्रहरी सहायक निरीक्षक महेन्द्रसिंह भण्डारीसहित स्वास्थ्यकर्मीहरुको टोलीले स्वास्थ्य समस्या देखिएका चालकहरुलाई आवश्यक स्वास्थ्य परामर्श दिई उपचारको लागि स्वास्थ्य संस्थामा प्रेषण गरिएको हवल्दार डाँगीले जानकारी दिए । सामान्य स्वास्थ्य समस्याले पनि सवारी दुर्घटना निम्ताउन सक्ने भएकाले सवारी चालकहरुलाई स्वास्थ्यको ख्याल राखेर समयमै उपचार गर्न ट्राफिक कार्यालय बर्दियाले अनुरोध गरेको छ ।
प्रतिक्रिया दिनुहोस !
