वीरगन्ज : वीरगन्ज महानगरपालका वडा नम्वर ६ स्थित नाला सफाइ गर्ने क्रममा आइतबार बिहान ठूलो परिमाणमा बन्दुकमा प्रयोग हुने गोली फेला परेको छ । महानगरपालिकाका कर्मचारीहरूले नाला सफाइ गर्ने क्रममा प्लास्टिकको झोलामा विभिन्न हतियारमा प्रयोग हुने १०५ थान गोली फेला परेको हो ।
नाइन एमएमको ३२ थान, ३८ बोरको २४ राउण्ड, एसएलआरको ४ राउण्ड, हर्नेटको १७ राउण्ड सहित अन्य विभिन्न बन्दुकमा लाग्ने गरि कूल १०५ थान गोली फेला परेको पर्साका प्रहरी उपरीक्षक कोमल शाहले जानकारी दिए ।
फेला परेकोमध्ये ४ वटा गोली बिग्रेको अवस्थामा भेटिएको पनि उनले जानकारी दिए ।
उक्त गोली कसले कहिले नालामा फालेको भन्ने बारे केही खुलेको छैन । यसबारे अनुसन्धान भइरहेको प्रहरी उपरीक्षक शाहले बताए । नाला सफा गर्ने क्रममा गोली भेटिएपछि सफाइकर्मीले प्रहरीलाई खबर गरेका थिए ।
गोली भेटिएको खबर पाउनासाथ जिल्ला प्रहरी कार्यालय पर्साका प्रहरी उपरीक्षक शाह आफै भेटिएको स्थानमा पुगेका थिए ।
प्रतिक्रिया दिनुहोस !
