काठमाडौं : टर्की जान लागेका जर्मन नागरिक ७ केजी चरेससहित पक्राउ परेका छन् । ६३ वर्षीय पउल वेस्टर्स सोमबार बिहान त्रिभुवन अन्तर्राष्ट्रिय विमानस्थलबाट ६ केजी ८ साय ६० ग्राम चरेससहित पक्राउ परेका हुन् ।
विमानस्थल सुरक्षा प्रहरी प्रमुख डीआइजी अर्जुन चन्दले चरेससहित जर्मन नागरिक पक्राउ परेको अन्नपूर्णलाई जानकारी दिए। डीआइजी चन्दका अनुसार गत मे महिनामा भिजिट भीषामा उनी नेपाल घुम्न आएका थिए । उनी टर्किस एयरलाइन्सबाट इस्तानबुल जान लागेका थिए । विमानस्थलका सुरक्षा प्रहरीका अनुसार पउलले सुटकेसमा फल्सबटम बनाएर चरेस लुकाएर लैजान योजनामा थिए।
एक्सरे मेसिनमा सुटकेस स्क्रिनिङ गर्ने क्रममा सुरक्षा जाँचमा खटिएका प्रहरीलाई शंका लागेपछि सुटकेस खोतलेका थिए । त्यसैक्रममा कालो प्लाष्टिकमा बेरेर राखेको अवस्थामा चरेस फेला परेको हो।
घटनाको थप अनुसन्धान गर्न विमानस्थल प्रहरीले उनलाई बरामद लागुऔषधसहित लागुऔषध नियन्त्रण ब्युरोमा पठाएको छ ।
प्रतिक्रिया दिनुहोस !
