विराटनगर : मोरङको कटहरी गाउँपालिकाले बालबालिकालाई पौष्टिक आहार वितरण गरेको छ । गाउँपालिकाका अध्यक्ष देवराज चौधरीले कुपोषणको समस्याबाट ग्रस्त गाउँपालिकाका १४ जना बालबालिकालाई पौष्टिक आहार वितरण गरेका हुन्।
कटहरी स्वास्थ्य चौकीमा आयोजित कार्यक्रममा गाउँपालिकाका अध्यक्ष देवराज चौधरीले बालबालिका र तिनका अभिभावकलाई पौष्टिक आहार हस्तान्तरण गरे । सो क्रममा कुपोषणको समस्या रहेका बालबालिकालाई हर्लिक्स १ किलो,अण्डा १ क्यारेट,आधा किलो घ्यू तथा बोडी,चना र केराउ एक-एक किलो प्रदान गरिएको थियो ।
गाउँपालिका भित्रका प्रत्येक वडाबाट दुईदुई जनागरी १४ जनालाई पौष्टिक आहार वितरण गरिएको कटहरी स्वास्थ्य शाखा प्रमुख सुकल प्रसाद साहले बताए । गाउँपालिकाले अपाङता र कुपोषण दुईवटै समस्याबाट पीडित रहेका बालबालिकालाई पौष्टिक आहारा वितरण गरेको हो। गाउँपालिका अध्यक्ष चौधरीले पालिका भित्रका कुपोषण प्रभावित बालबालिकालाई लक्षित गरेर गाउँपालिकाले विभिन्न कार्यक्रम सञ्चालन गर्दै आएको बताए ।
प्रदेश सरकार,कटहरी गाउँपालिका र करुणा फाउण्डेशनको त्रिपक्षीय सहयोगमा बालबालिकालाई पोषणयुक्त खानेकुरा वितरण गरिएको हो । कटहरी गाउँपालिका भित्र ४८० जना बालबालिका कुपोषणबाट पीडित रहेको कटहरी स्वास्थ्य शाखाले जनाएको छ ।
प्रतिक्रिया दिनुहोस !
