वीरगन्ज : वीरगन्जमा मंगलबार पहिलो पटक गहवामाई रथयात्रा निकालिएको छ। गहवामाईको नवनिर्मित मन्दिरको ११ औं वर्ष पूरा भएको अवसरमा रथयात्रा निकालिएको हो।
गहवामाई मन्दिर प्रांगणबाट मंगलबार बिहान साढे ७ बजे सुरु भएको रथयात्रामा नगरपरिक्रमापछि बिहान ११ बजे पुनः मन्दिर परिसरमा पुगेर समापन भयो।
रथयात्रामा पर्सा, बारा, रौतहट र सीमावर्ती भारतका विभिन्न स्थानबाट हजारौंको संख्यामा आएका हिन्दू भक्तजन र दर्शनार्थीहरूको सहभागिता थियो।
गहवामाई माताको मूर्ति काठको रथमा राखेर निकालिएको रथयात्रा माईस्थान चोक, घणटघर , रेल्वे रोड हुँदै छपकैया, वीर्ता, अलखियामठ , आदर्शनगर चोक, महावीरस्थान, माईस्थान चोक हुँदै पुन मन्दिर प्रांगणमा पुगेर समापन भएको हो।
रथ यात्रमा हिन्दु धर्म र संस्कृति झल्किने झाँकी पनि प्रदर्शन गरिएको थियो। झाँकी र पञ्चेबाजासहित निकालिएको रथयात्रामा हजारौंको संख्यामा सहभागी भक्तजनले जयमाता दी लेखिएको भगवा झण्डा बोकेका थिए।
रथयात्रामा सहभागी भक्तजनका लागि विभिन्न संघसंस्थाले नगरका ठाउँ ठाउँमा चिसो पानी, सर्बत, लस्सी र जुस निःशुल्क वितरण गरेका थिए।
मंगलबार नै साँझ मन्दिर परिसरमा भजनकृतन आयोजना गरिने गहवामाई रथयात्रा समितिका अध्यक्ष श्याम पोखरेलले बताए। बुधबार बिहान गहवामाईलाई ५६ प्रकारको भोग चढाइने र त्यसपछि भक्तजन तथा दर्शनार्थीका लागि भण्डारा सञ्चालन गरी महाप्रसाद वितरण गरिने समितिका सदस्य मुन्ना सर्राफले जानकारी दिए।
अध्यक्ष पोखरेलका अनुसार, रथ निर्माणमा करिब ४ सय घनफिट काठ प्रयोग गरिएको छ। रथ निर्माणको लागत मात्रै करिब २० लाख रुपैयाँ रहेको उनले बताए। भारत र नेपालका गरी १० भन्दा बढी कारिगरले रथ निर्माण गरेका हुन्।
प्रतिक्रिया दिनुहोस !
