दैलेख : वर्षात सुरुभएसँगै बाढी पहिरोको जोखिम बढेको छ । बिहीबार राती परेको वर्षातले दैलेखको ठाटीकाँध गाउँपालिकामा मानवीय तथा खेतीबालीमा क्षती पुर्याएको छ ।
जिल्ला प्रहरी कार्यालय दैलेखका प्रमुख डीएसपी किशोर लम्सालका अनुसार ठाटीकाँध गाउँपालिका–४ स्थित भुतगाड खोलाले स्थानीय एक किशोरीलाई बगाएको छ ।
आज बिहान घट्टबाट घर फर्किंदै गरेकी १७ वर्षीया उर्मिला कठायतलाई खोलाले बगाएको डीएसपी लम्सालले जानकारी दिए । डीएसपी लम्सालका अनुसार उर्मिलालाई स्थानीय बासिन्दाले करिब एक सय ५० मिटर तल मृत अवस्थामा फेला पारेका छन् ।
अहिले प्रहरीको टोली घटनास्थलतर्फ गइरहेको र क्षतिको थप विवरण आउन बाँकी रहेको प्रहरीले जनाएको छ ।
यसैबिच बिहीबार राती गुराँस गाउँपालिका–५ का रुद्र गिरीको घरमा चट्याङ्ग परेको छ ।
घरमा परेको चट्याङ्गमा परी गिरीको श्रीमती ४४ वर्षीया चन्द्रा गिरी र १७ वर्षीया छोरी माया गिरी घाइते भएका छन् । उनीहरुको शरीरका केही भागमा चोट लागेको र उपचारका लागि कर्णाली प्रदेश अस्पतालतर्फ लगिएको डिएसपी लम्सालले बताए ।
प्रतिक्रिया दिनुहोस !
