हेटौंडा : मकवानपुरको राक्सिराङ गाउँपालिकाले आगामी आथिर्क वर्ष २०८०-०८१ को लागि नीति तथा कार्यक्रम र बजेट सार्वजनिक गरेको छ ।
पालिकाको १४ औँ गाउँसभामा उपाध्यक्ष बनस्तम थिङले कूल ५७ करोड ८८ लाख ९७ हजार १९७ रुपैयाँको बजेट प्रस्तुत गरेका हुन् ।
बजेटमा पुँजीगततर्फ २४ करोड ५३ लाख ६५ हजार र चालुतर्फ ३५ करोड ४१ लाख ६० हजार रुपैयाँ छुट्याइएको छ ।
गाउँपालिकाले सामाजिक विकासतर्फ २२ करोड ६७ लाख ७८ हजार रुपैयाँ विनियोजन गरेको छ । शिक्षातर्फ १५ करोड ७२ लाख रुपैयाँ छुट्याइएको छ भने सडक, पुल तथा झोलुङ्गे पुलको लागि ४ करोड ९९ लाख रुपैयाँ विनियोजन गरेको छ ।
भवन तथा सहरी विकासतर्फ १ करोड ३० लाख विनियोजन गरिएको छ भने खानेपानीतर्फ १ करोड ६० लाख रुपैयाँ खर्च गर्ने लक्ष्य राखिएको छ ।
स्वास्थ्यतर्फ ४ करोड ७० लाख रुपैयाँ छुट्याएको गाउँपालिकाले कृषितर्फ १ करोड ७२ लाख रुपैयाँ विनियोजन गरेको छ ।
त्यस्तै पूर्वाधार विकासतर्फ ७ करोड ९० लाख रुपैयाँ खर्च गर्ने लक्ष्य राखिएको छ । विपद् व्यवस्थापनतर्फ ४० लाख रुपैयाँ विनियोजन गरेको गाउँपालिकाले उद्योग, रोजगारी प्रवर्द्धन तथा गरिबी निवारणका लागि २५ लाख रुपैयाँ विनियोजन गरेको छ । त्यस्तै सञ्चार तथा सूचनातर्फ ३३ लाख रुपैयाँ छुट्याइएको छ ।
पालिकाले महिला बालबालिका, ज्येष्ठ नागरिक, अपाङ्ग, दलित र पिछडिएका वर्गको उत्थान र प्रवर्धनात्मक कार्यक्रमको लागि २८ लाख रुपैयाँ विनियोजन गरेको छ ।
खर्च बेहोर्ने स्रोतमध्ये आन्तरिक स्रोतबाट ५ करोड ४ लाख ९५ हजार रुपैयाँ आम्दानी हुने अनुमान गरिएको छ । संघीय सरकारबाट जम्मा ४२ करोड ५९ लाख ७० हजार रुपैयाँ प्राप्त हुने अनुमान गरिएको छ ।
त्यस्तै प्रदेश सरकारबाट ७ करोड ७९ लाख ३२ हजार रुपैयाँ आम्दानी हुने लक्ष्य राखिएको छ । स्थानीय राजस्व संकलनबाट २ करोड ४५ लाख रुपैयाँ आम्दानी हुने लक्ष्य राखिएको छ ।
चालु आवमा पालिकाको बजेट ६६ करोड रुपैयाँ कार्यान्वयन भएको थियो । संघ र प्रदेशबाट प्राप्त हुने अनुदानमा कटौती भएपछि आगामी वर्षको बजेट करिब १० करोड रुपैयाँ घटेको हो ।
गाउँसभामा गाउँपालिका अध्यक्ष राजकुमार मल्लले दूर्गम राक्सिराङमा समृद्धिको खाका कोर्न जनप्रतिनिधिहरु निरन्तर लागिपरेको बताए ।
त्यस्तै प्रमुख प्रशासकीय अधिकृत देवचन्द्र गर्तौलाले बजेटमार्फत् शिक्षा, स्वास्थ्य, कृषि तथा पशुपालन, सडक पूर्वाधार, ग्रामिण विद्युतीकरण, नदिजन्य व्यवस्थापन, सिपमुलक तालिम र विशेषगरी जनजाति तथा सिमान्तकृत चेपाङ समूदायको हितका सन्दर्भका कार्यक्रमलाई प्राथमिकता दिइएको उल्लेख गरे ।
प्रतिक्रिया दिनुहोस !
