वीरेन्द्रनगर : जुम्लामा करेन्ट लागेर एक किशोरीको मृत्यु भएको छ। उक्त घटनामा ४ जना घाइते भएका छन्।
जुम्लाको कनकासुन्दरी गाउँपालिका–८ सुमलगाउँको खलापानी भन्ने ज्युलोमा धान रोपेको खेत गोड्ने क्रममा करेन्ट लागेर एक जना किशोरीको मृत्यु भएको हो।
मृत्यु हुनेमा जुम्लाको कनकासुन्दरी गाउँपालिका सुमलगाउँ निवासी १७ वर्षीया प्रमिला परियार रहेको जिल्ला प्रहरी कार्यालय जुम्लाका सूचना अधिकारी धर्मराज जोशीले जानकारी दिए।
उनका अनुसार लुड्कु जलविद्युत आयोजनाको विद्युतको तार हावाहुरीले खेतमा परेको हुनाले करेन्ट लागेको हो। अन्य चार जना घाइते सबैको अवस्था सामान्य छ।
घाइते सबैको उपचार कर्णाली स्वास्थ्य विज्ञान प्रतिष्ठान जुम्लामा भइरहेको छ। घाइते हुनेहरूमा सोही गाउँकी शान्ति दमाई, राजु दमाई, मन दमाई र वीरु दमाई रहेका छन्।
प्रतिक्रिया दिनुहोस !
१
