नुवाकोट : नुवाकोटको मझुवाकी एक जना फरक क्षमताकी युवतीलाई घरमै पुगेर नागरिकता प्रदान गरिएको छ । तारकेश्वर गाउँपालिका ६ गुरासे मझुवा घर भएकी शारीरिकक तथा मानसिक रुपमा अशक्त २१ वर्षीया सन्तोषी रिमाललाई जिल्ला प्रशासन कार्यालय नुवाकोटले मंगलबार घरमै पुगेर नेपाली नागरिकताको प्रमाणपत्र प्रदान गरेको हो ।
प्रमुख जिल्ला अधिकारी किरण थापाको नेतृत्वमा गएको टोलीले नागरिकताको प्रमाणपत्र प्रदान गरेको हो ।
तोयावहादुर रिमालका चार छोरी र एक छोरामध्ये कान्छी छोरी सन्तोषी रिमालको जन्म २०५८ साल पुस १२ गते भएको हो । उनलाई तारकेश्वर ६ का वडाध्यक्ष नारायण रिमालले आवश्यक कागजपत्रसहित जिल्ला प्रशासन कार्यालय नुवाकोटलाई एक महिना अगाडि नेपाली नागरिकताको लागि सिफारिस गरेका आधारमा नागरिकताको प्रमाणपत्र प्रदान गरिएको हो ।
नागरिकता पाएपछि खुसी हुदै सन्तोषीका परिवारजनले उनलाई अपांगता प्रोत्साहन भत्ता र अन्य सुविधाका लागि सहजता भएको बताएका छन् ।
विदुरस्थित जिल्ला प्रशासन कार्यालय आउन असमर्थ रहेका अशक्त व्यक्तिलाई घरमै पुगेर नेपाली नागरिकताको प्रमाणपत्र प्रदान गर्ने अभियान सञ्चालन गरिएको सहायक प्रजिअ वेदनिधि अधिकारीको भनाई छ ।
प्रतिक्रिया दिनुहोस !
