आन्तरिक विवादका कारण रौतहटमा पाँच स्थानीय तहले वार्षिक नीति तथा कार्यक्रम प्रस्तुत गर्न सकेनन्

रौतहट : स्थानीय तह शासन ऐनअनुरुप आउदो वर्षको नीति,कार्यक्रम तथा योजना छनौट गर्न तोकिएको समय सीमाभित्र रौतहटको पाँचवटा पालिकाले अधिवेशन गर्न सकेनन् । 

आन्तरिक विवाद एवं अन्य कारणले असार १० भित्र रौतहटका ५ वटा पालिकाहरुले नगर तथा गाउँ अधिवेशन गर्न सकेको छैन । माधवनारायण, गढीमाई र फतुवा विजयपुर नगरपालिका तथा दुर्गा भगवती र यमुनामाई गाउँपालिकाले असार १४ गते भइसक्दा पनि अधिवेशन गर्न सकेनन् । स्थानीय तह शासन व्यवस्था ऐनमा असार १० भित्रमा नीति तथा कार्यक्रमहरु पेश गरेर योजनाहरु छनौट गरिसक्नुपर्ने कानुनी प्रावधान छ ।

रौतहटमा रहेका १८ स्थानीय तहमध्ये पाँचवटाले नीति तथा कार्यक्रम ल्याउन नसकेका हुन् । जनप्रतिनिधिबीच आपसी तालमेल नहुनु,आन्तरिक भागबण्डा,तथा अन्य विभिन्न कारण ले ती पालिकाहरुको नीति तथा कार्यक्रम प्ररस्तुत हुन नसकेको हो ।

जिल्लाको १८ स्थानीय तहमध्ये सबैभन्दा पहिलो राजदेवी नगरपालिकाले असार ७ गते अधिवेशन गरेर आफ्ना नीति कार्यक्रम र योजनाहरु पारित गरिसकेको राजदेवी नपाका प्रमुख प्रशासकीय अधिकृत प्रलव कायस्थले जानकारी दिए । 

यस्तै मौलापुर, इशनाथ, चन्द्रपुर, वृन्दावन, गुजरा, देवाही गोनाही, बौधीमाई, राजपुर, परोहा, गरुडा नगरपालिकामा असार १० गते नगरअधिवेशन सम्पन्न भईसकेको छ भने असार ११ गते कटहरिया नगरपालिकाले नगरअधिवेशन सम्पन्न गरेको हो।