कोशी प्रदेश
आवश्यक परे मध्यावधिमा जान्छौं, हिक्मत कार्कीलाई विश्वासको मत दिन्नौं : कांग्रेस
असार १४, २०८० बिहीबार १३:४६:४१
विराटनगर : नेपाली कांग्रेस कोसी प्रदेश संसदीय दलका नेता उद्दव थापाले आवश्यकता परेमा मध्यावधि निर्वाचनमा जान सकिने बताएका छन् । प्रदेशसभा सचिवालयमा सञ्चारकर्मीसँग संक्षिप्त कुरा गर्दै उनले अहिलेको सरकारलाई विश्वासको मत नदिने स्पष्ट पारे ।
प्रदेशका मुख्यमन्त्री हिक्मतकुमार कार्कीले विश्वासको मत माग्दै पत्र पठाउनु स्वभाविक रहेको उनको प्रतिक्रिया छ । उनले त्यसको जवाफ संसदबाटै दिने पनि बताए । 'प्रदेश मध्यावधिमा गयो भने फेस गरौंला । मध्यावधिमा जानू ठूलो कुरा भएन । तर, मुख्यमन्त्रीलाई विश्वासको मत दिँदैनौं, झ थापाले भने,' त्यसका लागि ४ दल (कांग्रेस, माओवादी, एकीकृत समाजवादी र जसपा) बीचमा एक भएर अघि बढ्ने सहमति भएको छ । सहमति अक्षरस पालना हुन्छ । त्यसमा कुनै शंका गर्नु पर्दैनन् ।'
उनले प्रदेशको जनमत नै अलि असहज खालको प्राप्त भएकाले यो अवस्था आएको उल्लेख गरे । जनमतका आधारले मध्यावधिमा जानुपर्ने अवस्था आउन सक्ने उनको शंकेत थियो । तर, मध्यावधिमा प्रदेशलाई जान नदिन धेरै प्रयास गरिने उनी बताउँछन् ।
एमाले नेतृत्वको सरकार ढलेपछि प्रदेशमा गठबन्धन दलबीच सहमतमै नयाँ सरकार बन्ने पनि उनको भनाइ छ। थापाले गठबन्धनको ठूलो दल भएकाले नयाँ सरकारको नेतृत्व कांग्रेसले गर्न पाउनु पर्ने पनि बताए । तर, सरकारका विषयमा शीर्ष नेतृत्वले गरेको निर्णय स्वीकार्य हुने उनी बताउँछन् ।
प्रदेशका मुख्यमन्त्री हिक्मतकुमार कार्कीले आज विश्वासको मत लिँदैछन् । उनलाई राप्रपाको साथ छ । सत्तारुढ दलसँग ४६ सांसद छन् । विपक्षी गठबन्धनसँग पनि सभामुखबाहेक ४६ नै सांसद छन् ।
सांसद संख्याका आभारमा समान मत आएर बराबरीको अवस्था भएमा प्रदेश मध्यावधितिर जाने हो कि भन्ने आशंकाबीच कांग्रेस संसदीय दलका नेताबाट यस्तो प्रतिक्रिया आएको हो ।
तर, माओवादीबाट प्रदेशसभा सदस्यमा निर्वाचित सभामुख बाबुराम गौतमलाई निर्णायक मतका लागि प्रयोग गर्ने गठबन्धनको तयारी छ। कानुनविद् भने सरकार गठनमा सभामुखको प्रयोग संविधानविपरीत हुने बताउँछन् ।
प्रतिक्रिया दिनुहोस !
