सिन्धुली : सिन्धुलीमा पछिल्ला दिनहरूमा मानव अधिकार उलंघनका घटनाहरू बढ्दै गएको पाइएको छ । बिहीबार अनौपचारिक क्षेत्र सेवा केन्द्र (इन्सेक) ले सिन्धुलीमाढीमा आयोजना गरेको ‘मानव अधिकार वर्ष पुस्तक–२०२४’ वार्षिक पूर्वसमीक्षा कार्यक्रम सार्वजनिक गरिएको तथ्यांकले यस्तो देखाएको हो ।
तथ्यांक अनुसार जिल्लामा गत पुसदेखि जेठ मसान्तसम्म ६ महिनाको अवधिमा ५३ वटा मानवअधिकार उलंघनका घटनाहरू घटेका छन् । जसमा १२ बालिका बलात्कृत भएका छन् । तीनजना महिलामाथि समेत जबरजस्त बलात्कार भएको छ । एकजनामाथि बालयौन दुर्व्यवहार भएको छ ।
दुईवटा बहुविवाह, एकवटा बाल विवाह र शारीरिक तथा मानसिक हिंसाका ३३ वटा घटना घटेका घटेको तथ्यांकमा उल्लेख छ।
सन् २०२२ मा जिल्लामा १९ बालिका कलात्कृत भएका थिए । बलत्कार तथा यौनजन्य दुव्र्यवहारका ४२ घटना भएका थिए । सन् २०२१ मा जिल्लामा बलात्कारका जम्मा २६ वटा मात्र घटना घटेका थिए । गत वर्षको तुलनामा यस वर्ष ६ महिनामै बलात्कारका १४ वटा घटना हुनु दुःखद भएको प्रमुख जिल्ला अधिकारी सुनिता नेपालले समिक्षामा बताइन् ।
महिला तथा बालिकाविरुद्ध हुने हिंसालाई हल्का रुपमा लिन नहुने र जिम्मेवार भएर वकालत र न्यायका लागि लाग्नुपर्ने धारणा राखिन् । बलात्कारका अधिकांश घटना पीडितका नजिकका आफन्त र नातेदार संलग्न रहेको पाइएको छ।
बलात्कार तथा यौनजन्य हिंसाका घटनाहरू मुद्दाको प्रक्रियामा गए पनि होस्टाइल हुने क्रम उत्तिकै बढ्दो रहेको जनाइएको छ । समीक्षा कार्यक्रममा अनुसन्धान र कानुन कार्यान्वयन गर्ने निकाय पीडितलाई न्याय र संरक्षण दिन चुकेको अधिकारकर्मीहरुले बताए ।
जिल्ला सहन्यायाधिवक्ता अमृता देवकोटाले मानवअधिकार कतिपय मानवअधिकारसँग सम्बन्धित राज्यका कानुन संशोधनको जरुरी रहेको बताइन् । ‘उच्चस्तरबाटै मानवअधिकार उलंघनका घटना होस्टाइल गराउने काम भएको प्रतिवेदन आउनु दुःखद हो । यस्ता घटनालाई कम गर्न कानुननै संशोधन जरुरी छ,'देवकोटाले भनिन् ।
उता पछिल्लो समय जिल्लामा हिंसामा परेका पीडितहरू उजुरी गर्न आउने क्रम बढेका कारण मानवअधिकार उलंघनका घटनामा वृद्धि भएको जिल्ला प्रहरी कार्यालय सिन्धुलीका प्रमुख राजकुमार सिलवालले बताए । उनले यस्ता घटनामा प्रहरीले गर्ने अनुसन्धानमा कुनै कमजोरी नहुने स्पष्ट पारे ।
प्रतिक्रिया दिनुहोस !
