वीरगन्ज : पर्साको जगरनाथपुर गाउँपालिकाले २० औं राष्ट्रिय धान दिवसमा दुईजना किसानलाई नगदसहित सम्मानित गरेको छ । राष्ट्रिय धान दिवसको अवसरमा शुक्रबार गाउँपालिकाको कृषि शाखाले आयोजना गरेको धान रोपाइँ कार्यक्रममा गाउँपालिकाले दुईजना किसानलाई जनही नगद ५/५ हजार रुपैयाँ प्रदान गरि सम्मानित गरेको हो ।
जगरनाथपुर गाउँपालिका - ४ हरपुरस्थित स्थानीय किसानको खेतमा आयोजित धान रोपाइँ कार्यक्रममा गाउँपालिकाका अध्यक्ष श्रीकान्त यादवले किसानसँगै धान रोप्दै हरपुरकै एक महिला र एक पुरुष किसानलाई जनही ५ हजार रुपैयाँ प्रदान गरे ।
खेती गर्ने किसानको आत्मबल बढाइ प्रोत्साहित गर्ने उद्देश्यले किसानलाई नगद रकम प्रदान गरि सम्मानित गरिएको अध्यक्ष यादवले बताए । कार्यक्रममा बोल्दै उनले कृषि प्रधान मुलुकमा बर्सेनि ३० अर्ब बढि मुल्यको चामल मात्रै आयात गर्नुपर्ने अवस्था अत्यन्तै दुर्भाग्यपूर्ण भएको बताए ।
नेपाललाई कम्तिमा पनि धान र चामलमा आत्मनिर्भर बनाउन सकिए किसानको जीवनस्तर उकासिने भन्दै उनले भने,‘नयाँ बजेटमा हाम्रो पालिकाले कृषिलाई मुख्य प्राथमिकता दिएको छ ,किसानलाई व्यसायिक खेतीका लागि प्रोत्साहित गर्छौं ,मल ,बीउ ,सिंचाइ र उपजको बजार व्यवस्थापनको लागि पालिकाले योजना बनाएर काम गर्छ ।
गाउँपालिका अध्यक्ष यादवकै अध्यक्षतामा भएको धान रोपाइँ कार्यक्रममा गाउँपालिकाकी उपाध्यक्ष बबिता सिंह क्षेत्री , वडा नम्बर ३ का वडाअध्यक्ष सुवाष यादव , वडा नम्बर ४ का वडाअध्यक्ष प्रभु महत्तो नुनिया , कृषि शाखाका प्रमुख शत्रुधन चौरसिया , स्थानीय किसान , गाउँपालिकाका कर्मचारीलगायतको सहभागीता थियो ।
प्रतिक्रिया दिनुहोस !
